கட்டுப்பாடுகளில் புதிய தளர்வுகள்; வணிக வளாகங்களை தவிர்த்து மும்பையில் எல்லா கடைகளையும் திறக்க அனுமதி

மராட்டியத்தில் வருகிற 15-ந் தேதி வரை கொரோனா கட்டுப்பாடுகள் நீட்டிக்கப்பட்டுள்ளது.

அதே நேரத்தில் கொரோனா குறைந்து வருவதால் தளர்வுகளையும் நேற்று முன்தினம் இரவு முதல்-மந்திரி உத்தரவ் தாக்கரே அறிவித்தார். அப்போது காலை 7 மணி முதல் 11 மணி வரை திறந்து வைக்க அனுமதிக்கப்பட்ட காய்கறி, மளிகை உள்ளிட்ட அத்தியாவசிய கடைகள் செயல்படும் நேரத்தை மதியம் 2 மணி வரை நீட்டித்து உத்தரவிட்டார்.அத்தியாவசியமற்ற பொருட்கள் விற்கும் 

தனிக்கடைகளை திறப்பது குறித்து அந்தந்த மாவட்ட, மாநகராட்சி நிர்வாகங்கள் முடிவு எடுத்து கொள்ளலாம் என்றும் முதல்-மந்திரி அறிவித்தார். இந்தநிலையில் இன்று(செவ்வாய்க்கிழமை) முதல் மும்பை, புனேயில் அனைத்து வகையான கடைகளையும் திறக்க மாநகராட்சி நிர்வாகங்கள் அனுமதி வழங்கி உள்ளது.

வணிக வளாகம், ஷாப்பிங் சென்டர்கள் தவிர்த்து தனியாக உள்ள அத்தியாவசியமற்ற அனைத்து கடைகள் திங்கள் முதல் வெள்ளி வரை காலை 7 மணி முதல் மதியம் 2 மணி வரை திறக்க அனுமதி வழங்கப்படுகிறது. மேலும் இதில் சாலையின் ஒருபுறத்தில் உள்ள கடைகள் திங்கள், புதன், வெள்ளி ஆகிய கிழமைகளிலும், மறுபுறத்தில் உள்ள கடைகள் செவ்வாய், வியாழக்கிழமைகளில் திறக்க வேண்டும். இந்த உத்தரவு வருகிற 15-ந் தேதி வரை அமலில் இருக்கும்.

இவ்வாறு அதில் கூறப்பட்டு உள்ளது.

இதேபோல புனேயிலும் அனைத்து வகையான தனிக்கடைகளையும் இன்று முதல் 10 நாட்களுக்கு காலை 7 மணி முதல் மதியம் 2 மணி வரை திறக்க மாநகராட்சி அனுமதி வழங்கி உள்ளது. இதில் மதுக்கடைகளும் அடங்கும்.பொது மக்கள் பிற்பகல் 3 மணிக்கு மேல் அத்தியாவசியம் இல்லாத தேவைகளுக்காக வெளியே சுற்றக்கூடாது எனவும் மாநகராட்சி எச்சரித்து உள்ளது.

நாசிக்

நாசிக்கில் வணிக வளாகங்களை தவிர்த்து தனிக்கடைகளை காலை 7 மணி முதல் மதியம் 2 மணி வரை திறக்க அனுமதிக்கபட்டு உள்ளது. இந்த உத்தரவு வருகிற 15-ந் தேதி வரை அமலில் இருக்கும். இதபோல நாக்பூரிலும் அனைத்து வகையான கடைகளையும் திறக்க அனுமதிக்கப்பட்டு இருக்கிறது. கடைகளில் வாடிக்கையாளர்கள் கட்டாயம் முக கவசம் அணிய வேண்டும், சமூக இடைவெளியை கடைப்பிடிக்க வேண்டும் என்று அரசு உத்தரவிட்டு உள்ளது.