கிராமப்புறங்களில் கொரோனா நோய் தடுப்பு பணிகள்

தமிழகத்தில் கொரோனா பாதிப்பு படிப்படியாகக் குறைந்து வருகிறது. நாளொன்றுக்கு 36 ஆயிரத்திற்கும் மேற்பட்ட நபர்கள் பாதிக்கப்பட்டு வந்த நிலையில், தற்போது பாதிப்பு கடுமையாக குறைந்துள்ளது. அதன்படி 10 ஆயிரத்திற்கும் குறைவான நபர்களே தற்போது கொரோனாவால் பாதிக்கப்பட்டு வருகின்றனர். குறிப்பிட்ட சில மாவட்டங்களை தவிர்த்து மீதமுள்ள மாவட்டங்களில் பாதிப்பு வெகுவாக குறைந்துள்ளது. இதனால் அரசும் பல்வேறு தளர்வுகளை அறிவித்திருக்கிறது.
தற்போது நகர்புற அதைத்தொடர்ந்து கிராமப்புறங்களில் கொரோனா பரவல் அதிகரிக்க தொடங்கி இருக்கிறது. இதனால் மாவட்ட சுகாதாரத்துறை சார்பில் பல்வேறு குழுக்கள் நியமிக்கப்பட்டு கொரோனா கட்டுப்படுத்தும் பணி தீவிரமாக நடைபெற்று வருகிறது. மேலும் புறநகர் பகுதியில் பல்வேறு இடங்களில் அடிக்கடி காய்ச்சல் முகாம்களும் தடுப்பூசி செலுத்தும் பணிகளும் மிகத் தீவிரமாக நடைபெற்று வருகிறது.
இந்த நிலையில் மதுரை மாவட்டம் ஒத்தக்கடை பகுதியில் நேற்று நடைபெற்ற தடுப்பூசி செலுத்தும் முகாமினை துணை இயக்குனர் பார்வையிட்டு ஆய்வு செய்தார். அதில் சுமார் 270 பயனாளிகள் பயன் பெற்றனர். குறிப்பாக 45 வயதிற்கு மேற்பட்டவர்கள், தாய்ப்பாலூட்டும் தாய்மார்கள் மற்றும் அவர்களது கணவர்கள், மாற்றுத்திறனாளிகள் உள்ளிட்டோர் கலந்து கொண்டனர்.
இதுபோல் மேலூர் திருவாதவூர் அரசு ஆரம்ப சுகாதார நிலையத்திற்குட்பட்ட, கட்டயம்பட்டி கிராமத்தில், கொரோனா தொற்று ஏற்பட்ட நபர்களுடன் தொடர்பில் இருந்தவர்களுக்கு கொரோனா பரிசோதனை செய்யப்பட்டது. இந்த பணிகளையும் துணை இயக்குனர் பார்வையிட்டார்.
மேலும் அங்குள்ள மக்களுக்கு முககவசம் மற்றும் சமூக விலகல் போன்றவற்றின் முக்கியத்துவம் குறித்து எடுத்துரைத்து, மூன்றாம் அலையில் இருந்து எவ்வாறு பாதுகாத்துக்கொள்ள வேண்டும் என அறிவுத்தினார்.