மாநில இளைஞர் விருது பெற தகுதியானவர்கள் விண்ணப்பிக்கலாம்-மதுரை விளையாட்டு மேம்பாட்டு ஆணையம் அறிவிப்பு

மதுரை விளையாட்டு மேம்பாட்டு ஆணையம் வெளியிட்டுள்ள செய்திக்குறிப்பில் கூறி இருப்பதாவது:-
சமுதாய வளர்ச்சிக்கு சேவையாற்றும் இளைஞர்களின் பணியை அங்கீகரிக்கும் பொருட்டு முதல்-அமைச்சர் மாநில இளைஞர் விருது ஒவ்வொரு ஆண்டும் சுதந்திர தினத்தன்று வழங்கப்படுகிறது. இந்த விருது 15 வயது முதல் 35 வயது வரை உள்ள 3 ஆண்கள், 3 பெண்களுக்கு வழங்கப்படும். இந்த விருது ரூ.50 ஆயிரமும், பாராட்டு பத்திரம், பதக்கம் ஆகியவை உள்ளடக்கியதாகும்.
15 வயது முதல் 35 வயதுள்ள ஆண், பெண் ஆகியோர் விண்ணப்பிக்கலாம். கடந்த ஏப்ரல் 1-ந் தேதி அன்று 15 வயது நிரம்பியவராகவும், கடந்த மார்ச் 31-ந் தேதி அன்று 35 வயதிற்குள்ளவராக இருத்தல் வேண்டும்.
மேலும் கடந்த 1-4-2020 முதல் 31-3-2021 வரை உள்ள காலக்கட்டத்தில் செய்த சேவைகள் மட்டுமே கருத்தில் கொள்ளப்படும்.
விருதிற்கு விண்ணப்பிக்கும் முன்பு குறைந்த பட்சம் 5 ஆண்டுகள் தமிழகத்தில் குடியிருந்தவராக இருத்தல் வேண்டும். (சான்று இணைக்கப்பட வேண்டும்).
மத்திய, மாநில அரசுகள், பொதுத்துறை நிறுவனங்கள், பல்கலைக்கழகங்கள், கல்லூரி, பள்ளிகளில் பணியாற்றுபவர்கள் இவ்விருதிற்கு விண்ணப்பிக்க இயலாது. விண்ணப்பதாரருக்கு உள்ளூர் மக்களிடம் உள்ள செல்வாக்கு விருதிற்கான பரிசீலனையில் கணக்கில் கொள்ளப்படும்.
இணையதளம் மூலம் விண்ணப்பிக்க வருகிற 30-6-21 அன்று மாலை 4 மணி ஆகும்.
இவ்விண்ணப்பப்படிவம் தமிழ்நாடு விளையாட்டு மேம்பாட்டு ஆணையத்தின் இணையதளத்தில் உள்ளது. ஆன்லைன் மூலம் மட்டுமே விண்ணப்பங்கள் சமர்ப்பித்தல் வேண்டும் என்று மதுரை மாவட்ட கலெக்டர் தெரிவித்துள்ளார்.
இவ்வாறு அதில் கூறப்பட்டுள்ளது.