ஐதராபாத்தில் இருந்து கன்னியாகுமரிக்கு புதிய ரெயில் இயக்க பரிந்துரை

இந்திய ரெயில்வேயை பொறுத்தமட்டில் கடந்த 7 வருடங்களில் தென்மாவட்டங்களுக்கான ரெயில் சேவையில் புதிய ரெயில்கள் இயக்கம் என்பது இல்லாமல் உள்ளது. தென்னக ரெயில்வேயில் 2 கோட்டங்களை கொண்ட கேரள மாநிலத்துக்கு ஒதுக்கப்படும் ரெயில்களில் பாதியளவுக்கு கூட 4 கோட்டங்களை கொண்ட தமிழகத்துக்கு ஒதுக்குவதில்லை.
ஆனால், தென்னக ரெயில்வேயின் கட்டுப்பாட்டில் உள்ள கன்னியாகுமரியில் இருந்து ஈரோடு வழியாக ஜம்முதாவி வரை இயக்கப்பட்ட ஹிம்சாகர் எக்ஸ்பிரஸ் நெல்லையில் இருந்து ஜம்முதாவி வரை செல்லும் எக்ஸ்பிரஸ் ரெயிலுடன் ஈரோடு ரெயில் நிலையத்தில் இணைத்து இயக்கப்பட்டது. ஆனால், தற்போது கன்னியாகுமரி-ஹிம்சாகர் எக்ஸ்பிரஸ் நீக்கப்பட்டு நெல்லை-;ஜம்முதாவி மட்டும் இயக்கப்படுகிறது. இதுபோன்ற பாரபட்ச நடவடிக்கைகளை தென்னக ரெயில்வே மேற்கொண்டு வருகிறது.
அதனை தொடர்ந்து, தென்மத்திய ரெயில்வே மண்டலத்தின் சார்பில், இந்த ரெயிலை மதுரை வழியாக கன்னியாகுமரி வரை இயக்க சம்மதம் தெரிவிக்கப்பட்டுள்ளது. இதற்கான ஒப்புதலை தென்னக ரெயில்வே பொதுமேலாளர் அலுவலகமும், ரெயில்வே வாரியம் வழங்க வேண்டும் என்று தென்மத்திய ரெயில்வே கோரியுள்ளது.
அதன்படி, இந்த ரெயில் கன்னியாகுமரி வரை நீட்டிக்கப்பட்டால், ஐதராபாத் ரெயில் நிலையத்தில் இருந்து மாலை 6 மணிக்கு புறப்பட்டு மறுநாள் காலை 7.55 மணிக்கு தாம்பரம் ரெயில்நிலையம் வந்தடையும். அங்கிருந்து காலை 8 மணிக்கு புறப்பட்டு இரவு 8 மணிக்கு கன்னியாகுமரி ரெயில் நிலையம் சென்றடையும். மறுமார்க்கத்தில், கன்னியாகுமரியில் இருந்து காலை 6 மணிக்கு புறப்பட்டு மாலை 6 மணிக்கு தாம்பரம் ரெயில் நிலையம் சென்றடையும். அங்கிருந்து மாலை 6.10 மணிக்கு புறப்பட்டு மறுநாள் காலை 7.50 மணிக்கு ஐதராபாத் ரெயில் நிலையம் சென்றடையும்.
பயணிகள் எதிர்பார்ப்பு

எப்படி இருப்பினும், ரெயில்வே வாரியத்தை பொறுத்தமட்டில், வடஇந்தியர்களுக்கு தமிழகத்தில் மதுரை, கன்னியாகுமரி முக்கிய ஆன்மிக தலங்களாக உள்ளன. இதனால், அடிக்கடி ஆய்வு என்ற பெயரில் இங்கு வருவதை வழக்கமாக கொண்டுள்ளனர். அந்த அடிப்படையில், தென்மத்திய ரெயில்வேயின் கோரிக்கைக்கு ரெயில்வே வாரியம் உடனடியாக ஒப்புதல் தர வாய்ப்புள்ளது. கால அட்டவணை கமிட்டியில் இது குறித்து விவாதிக்கப்பட்டு விரைவில் அறிவிப்பு வெளியிடப்படும் என தென்மாவட்ட பயணிகளால் எதிர்பார்க்கப்படுகிறது.