111 மையங்களில் பொதுமக்களுக்கு கொரோனா தடுப்பூசி போடப்பட்டது

ஈரோடு

ஈரோடு மாவட்டத்தில் 111 மையங்களில் பொதுமக்களுக்கு கொரோனா தடுப்பூசி போடப்பட்டது.

ஈரோடு மாவட்டத்தில் கொரோனா தடுப்பூசி போடும் பணி தீவிரமாக நடந்து வருகிறது. தடுப்பூசி போட்டுக்கொள்ள மக்கள் அதிகம் ஆர்வம் காட்டி வருவதால் மாவட்டம் முழுவதும் தடுப்பூசி போடப்படும் மையங்களில் இரவிலேயே குவிய தொடங்கி விடுகின்றனர். டோக்கன் அடிப்படையிலேயே பொதுமக்களுக்கு தடுப்பூசி போடப்பட்டு வருகிறது. சில இடங்களில் வாக்குவாதம், தள்ளுமுள்ளு ஏற்படுவதால் போலீஸ் பாதுகாப்பும் போடப்பட்டு வருகிறது.

இந்த நிலையில் மாவட்டத்தில் நேற்று முன்தினம் முதல் தடுப்பூசி சுழற்சி முறையில் போடப்பட்டு வருகிறது. அதன்படி ஈரோடு மாநகராட்சி பகுதியில் உள்ள 60 வார்டுகளில் ஒவ்வொரு நாளும் 20 வார்டுகள் வீதம் தடுப்பூசி போடப்பட்டு வருகிறது.

அதன்படி நேற்று மாநகராட்சி பகுதிக்கு உள்பட்ட பி.பி. அக்ரஹாரம் நகர்ப்புற ஆரம்ப சுகாதார நிலையம், மாநகராட்சி நடுநிலைப்பள்ளி, வீரப்பன்சத்திரம் சுப்பிரமணிய கவுண்டன் வலசு, நெசவாளர் காலனி மாநகராட்சி நடுநிலைப்பள்ளி, வீரப்பன்சத்திரம் மாநகராட்சி அலுவலகம், எஸ்.எம்.வி.பி. மெட்ரிக் பள்ளி, குமலன்குட்டை மாநகராட்சி பள்ளி, சம்பத் நகர் அம்மன் பள்ளி, எம்.ஜி.ஆர். வீதி அங்கன்வாடி மையம், முனிசிபல் காலனி சத்துணவு கூடம், இடையன்காட்டுவலசு மாநகராட்சி உயர்நிலைப்பள்ளி.

சூரம்பட்டிவலசு அரசு மாணவிகள் விடுதி, சூரம்பட்டிவலசு மலைக்கோவில் அரசு மேல்நிலைப்பள்ளி, நஞ்சப்ப கவுண்டன்வலசு ஊராட்சி ஒன்றிய தொடக்கப்பள்ளி, தங்கச்சி சாலை ராதாகிருஷ்ணன் சாலை ஊராட்சி ஒன்றிய தொடக்கப்பள்ளி, சூரம்பட்டி சி.எஸ்.ஐ. தொடக்கப்பள்ளி, பாலசுப்பராயலு வீதி பள்ளி, செவன்த் டே பள்ளி, சி.எஸ்.ஐ. பள்ளி, கச்சேரி வீதி மாநகராட்சி பள்ளி, வளையக்கார வீதி மாநகராட்சி பள்ளி ஆகிய 20 மையங்களில் நேற்று கொரோனா தடுப்பூசி போடப்பட்டது.

முன்னதாக மக்கள் அதிகாலை முதலே மேற்கண்ட மையங்களில் குவிய தொடங்கினர். இடையன்காட்டுவலசு மாநகராட்சி உயர்நிலை பள்ளிக்கூடத்தில் தடுப்பூசி போட்டுக் கொள்ள வந்த பொதுமக்கள் தங்களுடைய காலணிகளை வைத்து இடம் பிடித்தனர். மேலும் சூரம்பட்டி பகுதியில் பொதுமக்கள் நீண்ட வரிசையில் நின்று கொரோனா தடுப்பூசி போட்டுக் கொண்டனர்.

இதேபோல் மொடக்குறிச்சி, அம்மாபேட்டை, அந்தியூர், பவானி, கொடுமுடி, பெருந்துறை, பவானிசாகர், டி.என்.பாளையம், நம்பியூர், கோபி, சத்தியமங்கலம், சென்னிமலை ஆகிய பகுதிகளிலும் நேற்று தடுப்பூசி போடப்பட்டது. ஈரோடு மாவட்டம் முழுவதும் 111 மையங்களில் தடுப்பூசி போடும் பணி நடந்தது.