மதுரையில் ‘டெல்டா பிளஸ்’ வைரசுக்கு வாலிபர் பலி

சில மாதமாகவே மதுரையில் உயிரிழப்பு அதிக அளவில் பதிவாகி வந்த நிலையில், தற்போது தான் உயிரிழப்புகள் குறைந்துள்ளது. மதுரையில் இதுவரை உயிரிழந்தவர்களின் எண்ணிக்கை 1077 ஆக உள்ளது. இந்தநிலையில் மதுரை அரசு ஆஸ்பத்திரியில் சிகிச்சை பெற்று வந்த 82 வயது மூதாட்டி ஒருவர் கொரோனா பாதிப்பால் நேற்று உயிரிழந்தார்.
இந்த நிலையில் தமிழகத்தில் மேலும் 3 பேருக்கு டெல்டா பிளஸ் வைரஸ் தாக்கி இருப்பதாக தமிழக அரசு அறிவித்துள்ளது. அவர்கள் சென்னை, காஞ்சீபுரம், மதுரை ஆகிய மாவட்டங்களை சேர்ந்தவர்கள். இதில் 2 பேர் நலமுடன் இருப்பதாகவும், ஒருவர் உயிரிழந்து விட்டதாகவும் சுகாதாரத்துறை அமைச்சர் மா.சுப்பிரமணியன் தெரிவித்துள்ளார்.
 இறந்தவர் மதுரையை சேர்ந்த 34 வயது வாலிபர் ஆவார். அவர் மதுரையில் உள்ள தனியார் மருத்துவமனையில் கடந்த  சில வாரங்களுக்கு முன்பு கொரோனா பாதிப்புடன் சிகிச்சையில் இருந்தபோது உயிரிழந்தது தெரியவந்தது. இந்தநிலையில் அவரிடம் இருந்து பெறப்பட்ட மாதிரிகளை சோதனை செய்தபோது அதில் டெல்டா பிளஸ் பாதிப்பு இருந்தது கண்டறியப்பட்டதாக மருத்துவத்துறையினர் தெரிவித்தனர்.
இந்த சம்பவம் மதுரையில் பெரும் பரபரப்பை ஏற்படுத்தி இருக்கிறது. மேலும் யாருக்காவது டெல்டா பிளஸ் வைரஸ் பாதிப்பு இருக்குமோ என்ற அச்சமும் மதுரை மக்களிடையே எழுந்துள்ளது. தற்போதுதான் கொரோனாவின் இரண்டாவது அலை படிப்படியாக குறைந்துள்ள நிலையில் டெல்டா பிளஸ் வைரஸ் மதுரை மக்களை அச்சத்தில் ஆழ்த்தி உள்ளது.