கணவனை கல்லால் தாக்கி கொலை செய்த மனைவி கைது

திருமங்கலம்,ஜூன்

திருமங்கலம் அருகே மனைவி கல்லால் தாக்கியதில் படுகாயம் அடைந்த பெயிண்டர் சிகிச்சை பலனின்றி இறந்தார். இதைத் தொடர்ந்து கொலை வழக்காக மாற்றி மனைவியை போலீசார் கைது செய்தனர்.

பெயிண்டர்

திருமங்கலம் அருகே உள்ள கூடக்கோவில் தெற்கு தெருவை சேர்ந்தவர் கிளிமுத்து (வயது 45). பெயிண்டர் வேலை பார்த்து வந்தார். இவருடைய மனைவி தமிழ்ச்செல்வி. இவர்களுக்கு 3 மகள்கள் உள்ளனர். 

கிளிமுத்து குடிப்பழக்கத்திற்கு அடிமையானவர். கடந்த சில மாதங்களாக குடித்துவிட்டு மனைவியிடம் அடிக்கடி தகராறு செய்து வந்தார்.

குடும்ப சூழ்நிலை காரணமாக தமிழ்செல்வி வேலைக்குச் சென்றார். இந்த நிலையில் கடந்த 26-ந்தேதி குடிபோதையில் வீட்டிற்கு வந்த காளிமுத்து தனது மகள்களை அடித்து வீட்டை விட்டு விரட்டினார். இதனால் 3 மகள்களும் பஸ் ஸ்டாப்பில் நின்று அழுது கொண்டிருந்தனர். வேலைக்குச் சென்றுவிட்டு திரும்பி வந்த தமிழ்ச்செல்வி சம்பவம் குறித்து கேள்விப்பட்டு அதிர்ச்சி அடைந்தார். பின்னர் தனது மகள்களை அழைத்துக் கொண்டு வீட்டுக்கு வந்தார்.

கல்லால் தாக்குதல்

குடிபோதையில் இருந்த கிளிமுத்து வழக்கம் போல் மனைவியிடம் தகராறு செய்தார். மேலும் அவரை அடித்து வீட்டிற்கு வெளியே தள்ளி உள்ளார். இதில் ஆத்திரமடைந்த தமிழ்செல்வி, கம்பு மற்றும் கல்லால் கணவரை தாக்கினார். அப்போது அவர் எறிந்த கல் காளிமுத்துவின் தலையில் தாக்கியதில் பலத்த காயம் அடைந்தார். பின்னர் அவர் மதுரை அரசு மருத்துவமனையில் சேர்க்கப்பட்டு சிகிச்சை பெற்று வந்தார்.

இந்த நிலையில் கிளிமுத்து சிகிச்சை பலனின்றி உயிரிழந்தார். இதைத் தொடர்ந்து கூடகோவில் போலீசார் கொலை வழக்குப்பதிவு செய்து தமிழ்செல்வியை கைது செய்தனர். மேலும் இது குறித்து விசாரணை மேற்கொண்டு வருகின்றனர்.

தந்தையை கொலை செய்து விட்டு தாய் சிறைக்கு சென்றதால் 3 பிள்ளைகளும் அனாதையாகி உள்ளனர். மதுவின் கொடுமையால் குடும்பமே சிதைந்துள்ள சம்பவம் அப்பகுதி மக்களை வேதனை அடைய செய்துள்ளது.