மேகதாது பிரச்சினை: இரு மாநில உறவுகளை சீர்குலைக்கும் வகையில் பேசுவதா? கர்நாடக மந்திரிக்கு டாக்டர் ராமதாஸ் கண்டனம்

சென்னை,

பா.ம.க. நிறுவனர் டாக்டர் ராமதாஸ் டுவிட்டரில் வெளியிட்டுள்ள அறிக்கையில் கூறியிருப்பதாவது:-

தமிழ்நாடு அரசு எதிர்த்தாலும் மேகதாது அணையை கட்டியே தீருவோம் என்று கர்நாடக உள்துறை மந்திரி கூறியிருக்கிறார். இரு மாநில உறவுகளை சீர்குலைக்கும் வகையிலான கர்நாடக மந்திரியின் இந்தக் கருத்து கண்டிக்கத்தக்கது. அங்கு அணையை கட்டக்கூடாது என்று தமிழக அனைத்துக் கட்சிக் கூட்டத்தில் தீர்மானிக்கப்பட்டிருக்கிறது.

கோர்ட்டு தீர்ப்பு, காவிரி நடுவர் மன்றத் தீர்ப்பு உள்ளிட்ட எதையும் மதிக்காமல் மேகதாது அணையை கட்டியே தீருவோம் என்று கர்நாடக மந்திரி தொடர்ந்து பேசி வருவது அரசியல் சட்டத்தில் குறிப்பிடப்பட்டுள்ள மாநிலங்களிடையே உறவு தத்துவத்திற்கு எதிரானது. அரசியலமைப்பு சட்டத்திற்கு எதிரான கர்நாடக மந்திரியின் பேச்சுகளை மத்திய அரசு வேடிக்கைப் பார்க்கக் கூடாது. கர்நாடக அரசை மத்திய அரசு கண்டிப்பதுடன், அரசியலமைப்புச் சட்டத்தின்படி உரிய நடவடிக்கை எடுக்க வேண்டும்.

இவ்வாறு அவர் கூறியுள்ளார்.