24 மாவட்டங்களில் உயிரிழப்பு இல்லை: 1,986 பேருக்கு கொரோனா

சென்னை,

தமிழகத்தில் நேற்று (சனிக்கிழமை) கொரோனா பாதிப்பு குறித்து மருத்துவம் மற்றும் மக்கள் நல்வாழ்வுத்துறை வெளியிட்டுள்ள செய்திக்குறிப்பில் கூறப்பட்டிருப்பதாவது:-

தமிழகத்தில் நேற்று புதிதாக 1 லட்சத்து 60 ஆயிரத்து 171 பேருக்கு கொரோனா பரிசோதனை செய்யப்பட்டது. இதில் 1,103 ஆண்கள், 883 பெண்கள் என மொத்தம் 1,986 பேருக்கு புதிதாக கொரோனா உறுதி செய்யப்பட்டுள்ளது. இதில் அதிகபட்சமாக கோவையில் 246 பேரும், சென்னையில் 204 பேரும், ஈரோட்டில் 165 பேரும், பாதிக்கப்பட்டுள்ளனர். குறைந்தபட்சமாக தென்காசி, தேனியில் தலா 11 பேரும், ராமநாதபுரம், பெரம்பலூரில் தலா 9 பேரும் பாதிப்புக்கு ஆளாகி உள்ளனர். இதில் 12 வயதுக்குட்பட்ட 104 குழந்தைகளுக்கும், 60 வயதுக்கு மேற்பட்ட முதியவர்கள் 288 பேருக்கும் தொற்று உறுதி செய்யப்பட்டுள்ளது.

26 பேர் உயிரிழப்பு

தமிழகத்தில் இதுவரை 3 கோடியே 65 லட்சத்து 72 ஆயிரத்து 876 பேருக்கு கொரோனா பரிசோதனை செய்யப்பட்டுள்ளது. அதில் 14 லட்சத்து 95 ஆயிரத்து 354 ஆண்களும், 10 லட்சத்து 64 ஆயிரத்து 205 பெண்களும், 3-ம் பாலினத்தவர் 38 பேர் உள்பட 25 லட்சத்து 59 ஆயிரத்து 597 பேருக்கு தொற்று உறுதி செய்யப்பட்டுள்ளது. அதில் 12 வயதுக்கு உட்பட்ட 93 ஆயிரத்து 689 குழந்தைகளும், 60 வயதுக்கு மேற்பட்ட 3 லட்சத்து 68 அயிரத்து 794 முதியவர்களும் இடம் பெற்றுள்ளனர்.

கொரோனாவுக்கு அரசு ஆஸ்பத்திரியில் 19 பேரும், தனியார் ஆஸ்பத்திரியில் 7 பேரும் என 26 பேர் சிகிச்சை பலனின்றி நேற்று உயிரிழந்துள்ளனர். அதில் அதிகபட்சமாக திருப்பூரில் 6 பேரும், சேலத்தில் 4 பேரும், நாமக்கலில் 3 பேரும், திருச்சி, கடலூரில் தலா 2 பேரும், வேலூர், நெல்லை, திருவள்ளூர், சிவகங்கை, புதுக்கோட்டை, பெரம்பலூர், மயிலாடுதுறை, மதுரை, கோவையில் தலா ஒருவரும் என 14 மாவட்டங்களில் உயிரிழப்பு ஏற்பட்டுள்ளது. 24 மாவட்டங்களில் உயிரிழப்பு இல்லை. தமிழகத்தில் இதுவரை 34 ஆயிரத்து 76 பேர் கொரோனா நோய் தொற்றால் உயிரிழந்துள்ளனர்.

2,178 பேர் ‘டிஸ்சார்ஜ்’

கொரோனா பாதிப்பில் இருந்து நேற்று 2,178 பேர் நேற்று ‘டிஸ்சார்ஜ்' செய்யப்பட்டுள்ளனர். இதில் அதிகபட்சமாக கோவையில் 223 பேரும், சென்னையில் 143 பேரும், தஞ்சாவூரில் 152 பேரும், சேலத்தில் 132 பேரும் அடங்குவர். இதுவரையில் 25 லட்சத்து 4 ஆயிரத்து 805 பேர் குணம் அடைந்து உள்ளனர். சிகிச்சையில் 20 ஆயிரத்து 716 பேர் உள்ளனர்.

இவ்வாறு அதில் கூறப்பட்டுள்ளது.