ஆடு திருட முயன்ற வாலிபர் கைது

வடமதுரை: 

வடமதுரை அருகே உள்ள ஆலம்பட்டியை சேர்ந்தவர் வெள்ளைச்சாமி (வயது 45). விவசாயி. இவர் தனது தோட்டத்து வீட்டில் கொட்டகை அமைத்து ஆடுகளை வளர்த்து வருகிறார். நேற்று முன்தினம் இரவு ஒரு மோட்டார் சைக்கிளில் வந்த 3 மர்ம நபர்கள் கொட்டகையில் இருந்த ஆடுகளை திருட முயன்றனர். 

ஆடுகளின் சத்தம் கேட்டு அங்கு வந்த பொதுமக்கள் அவர்களை விரட்டி பிடிக்க முயன்றனர். அதில் ஒருவர் மட்டும் சிக்கினார். மற்ற இருவரும் மோட்டார் சைக்கிளில் ஏறி மின்னல் வேகத்தில் தப்பி சென்றனர். பிடிபட்ட வாலிபரை பொதுமக்கள் வடமதுரை போலீசில் ஒப்படைத்தனர். 

போலீஸ் விசாரணையில் அவர், அய்யலூர் அருகே உள்ள வேங்கனூரை சேர்ந்த சங்கிலி (வயது 23) என்றும், தனது நண்பர்களுடன் ஆடு திருட வந்ததும் தெரியவந்தது. இதுகுறித்து போலீஸ் சப்-இன்ஸ்பெக்டர் சந்திரன் வழக்குப்பதிவு செய்து சங்கிலியை கைது செய்தார். மேலும் தப்பியோடிய ஒட்டன்சத்திரம் காந்தி நகரை சேர்ந்த கார்த்திக் (22), அய்யலூரை சேர்ந்த குணா (20) ஆகியோரை போலீசார் வலைவீசி தேடி வருகின்றனர்.