தாளவாடி அருகே சிறுத்தை தாக்கி மாடு பலி

தாளவாடி

தாளவாடி அருகே சிறுத்தை தாக்கி மாடு பலி ஆனது.

ஈரோடு மாவட்டம் சத்தியமங்கலம் புலிகள் காப்பகத்தில் சத்தியமங்கலம், பவானிசாகர், தாளவாடி, ஆசனூர் உள்பட 10 வனச்சரகங்கள் உள்ளன. இந்த வனச்சரகங்களுக்கு உள்பட்ட வனப்பகுதியில் புலி, சிறுத்தை, யானை, கரடி, காட்டெருமை, மான் போன்ற வனவிலங்குகள் வசித்து வருகின்றன. 

இதில் சிறுத்தை, புலி போன்றவை அவ்வப்போது கிராமத்துக்குள் புகுந்து ஆடு, மாடு மற்றும் நாய்களை வேட்டையாடி வருவது தொடர்கதையாகி வருகிறது. 

இதேபோல் ஒரு சம்பவம் தாளவாடியை அடுத்த நெய்தாளபுரம் கிராமத்தில் நடைபெற்று உள்ளது. 

நெய்தாளபுரம் கிராமத்தை சேர்ந்தவர் மாதேவா. இவர் மாடுகள் வளர்த்து வருகிறார். இவர் நேற்று மதியம் தன்னுடைய மாடுகளை அந்த பகுதியில் மேய்ச்சலுக்கு விட்டிருந்தார். சிறிது நேரம் கழித்து வந்து அவர் மாடுகளை பார்த்தபோது அதில் ஒரு பசு மாட்டை காணவில்லை. 

இதனால் அதிர்ச்சி அடைந்த அவர் அந்த பகுதியில் தேடிப்பார்த்தார். அப்போது தாளவாடி வனப்பகுதியை ஒட்டிய வனச்சாலையில் மாடு இறந்து கிடந்ததை கண்டார். ஏதோ மர்ம விலங்கு அடித்து கொன்றது தெரியவந்தது. உடனே அவர் தாளவாடி வனத்துறையினருக்கு தகவல் தெரிவித்தார்.

தகவல் அறிந்ததும் வனத்துறையினர் சம்பவ இடத்துக்கு விரைந்து சென்று மாட்டை பார்வையிட்டனர். பின்னர் அங்கு பதிவாகி இருந்த விலங்கின் கால் தடங்களையும் ஆய்வு செய்தனர். அப்போது அங்கு பதிவாகி இருந்த கால் தடம் சிறுத்தையின் கால் தடம் என கண்டுபிடித்தனர். வனப்பகுதியையொட்டி உள்ள வனச்சாலையில் மாடு மேய்ந்து கொண்டிருந்தபோது அங்கு வந்த சிறுத்தையானது, மாட்டை அடித்து கொன்றது தெரியவந்தது. இந்த சம்பவத்தால் அந்த பகுதியில் உள்ள பொதுமக்கள் அச்சத்தில் உள்ளனர்.