கொரோனா நிவாரண நிதிக்கு ரூ.10 ஆயிரம் அனுப்பிய பிச்சைக்காரர்

நாகர்கோவில், 

கொரோனா நிவாரண நிதிக்கு ரூ.10 ஆயிரத்தை பிச்சைக்காரர் அனுப்பி வைத்தார்.

தமிழகம் முழுவதும் கொரோனா பாதிப்பு அதிகமாக இருந்தது. அதுவும் 2-வது அலையின் போது ஏராளமானவர்கள் பாதிக்கப்பட்டு உயிரிழந்தனர். அதைத்தொடர்ந்து தமிழக அரசு கொரோனா நிவாரண நிதியை திரட்டி வருகிறது. அதற்கு  ஏழை முதல் தொழில் அதிபர் வரை அனைவரும் கொரோனா நிவாரண நிதியை அரசுக்கு வழங்கினார்கள். அதே சமயம் பிச்சை எடுத்து திரட்டிய பணத்தை ஒருவர் கொரோனா நிவாரண நிதிக்கு வங்கி மூலம் அனுப்பி உள்ளார். அதன் விவரம் வருமாறு:-

தூத்துக்குடி மாவட்டம் சாத்தான்குளம் ஆழங்கிணற்றை சேர்ந்தவர் பூல் பாண்டியன் (வயது 70). இவருக்கு 2 மகள்களும், ஒரு மகனும் உள்ளனர். இவர் ஊர் ஊராக சென்று பிச்சை எடுத்து வருகிறார். அப்போது கிடைக்கும் பணத்தில் தன் சாப்பாட்டுக்கும், வீட்டுக்கும் அனுப்பியது போக மீதம் உள்ள பணத்தை கொண்டு சமூக சேவைகளை செய்து வருகிறார்.

இந்த நிலையில் தற்போது தான் பிச்சை எடுக்கும் பணத்தை கொண்டு கொரோனாவால் பாதிக்கப்படும் மக்களுக்கு உதவ முடிவு செய்தார். அதன்படி கடந்த சில நாட்களாக அவர் ஊர் ஊராக சென்று பொதுமக்களிடம் பிச்சை எடுத்தார். அப்போது கிடைத்த ரூ.10 ஆயிரத்தை முதல்-அமைச்சரின் கொரோனா நிவாரண நிதிக்கு அனுப்பி வைத்துள்ளார். 

இதுபற்றி நாகர்கோவில் கலெக்டர் அலுவலகத்துக்கு வந்த பூல் பாண்டியன் கூறும்போது, ‘‘நான் தர்மம் பெற்று வாழ்க்கை நடத்தி வருகிறேன். எனக்கு சிறு வயதில் இருந்தே சமூக சேவை செய்வதில் ஆர்வம் அதிகம். தற்போது வரை என்னால் முடிந்த அளவுக்கு உதவி செய்கிறேன். முதல்-அமைச்சரின் கொரோனா நிவாரண நிதிக்கு கடைசியாக ரூ.10 ஆயிரத்தை நாகர்கோவிலில் உள்ள வங்கி மூலம் அனுப்பி வைத்தேன். இதுவரை கொரோனா நிவாரண நிதிக்கு மட்டும் மொத்தம் ரூ. 4 லட்சத்து 80 ஆயிரம் அனுப்பி உள்ளேன்’’ என்றார்.