போலீஸ் அதிகாரிகளுக்கு இடையே துப்பாக்கி சுடும் போட்டி

மதுரை மாவட்டம் கடவூர் துப்பாக்கி சுடும் தளத்தில் காவல்துறை உயர் அதிகாரிகளுக்கான துப்பாக்கி சுடும் போட்டி நேற்று நடைபெற்றது. தென்மண்டல ஐ.ஜி. அன்பு தலைமையில் இந்த போட்டிகள் நடைபெற்றது. இந்த துப்பாக்கி சுடும் போட்டியை சென்னை அதிவிரைவுப்படை சூப்பிரண்டு ஜெயச்சந்திரன் தலைமையில் வந்த காவல் அதிகாரிகள் நடத்தினர்.
இதில் மதுரை, திண்டுக்கல், ராமநாதபுரம் சரக டி.ஐ.ஜி.க்கள், மதுரை, விருதுநகர், திண்டுக்கல், தேனி, ராமநாதபுரம், சிவகங்கை மாவட்ட போலீஸ் சூப்பிரண்டுகள், மதுரை, பழனி, ராஜபாளையம் தமிழ்நாடு சிறப்பு காவல்படை கமாண்டன்ட்கள், மதுவிலக்கு அமலாக்க பிரிவு சூப்பிரண்டுகள், மதுரை மாநகர போலீஸ் துணை கமிஷனர்கள் உள்ளிட்டோர் பங்கேற்றனர்.
இன்சாஸ் ரக துப்பாக்கி சுடும் போட்டியில் கமாண்டன்ட் தேஷ்முக்சேகர் முதல் இடத்தையும், தென்மண்டல ஐ.ஜி. அன்பு 2-ம் இடத்தையும், தேனி போலீஸ் சூப்பிரண்டு டோங்ரே பிரவீன் உமேஷ் 3-ம் இடத்தையும் பிடித்தனர். அனைத்து போட்டி முடிவில் தேஷ்முக் சேகர் முதல் இடத்தையும், தென்மண்டல ஐ.ஜி. அன்பு 2-ம் இடத்தையும், டோங்ரே பிரவீன் உமேஷ் 3-ம் இடத்தையும் பெற்றனர்.
இதே போல் மாநிலம் முழுவதும் மண்டல வாரியாக உயரதிகாரிகளுக்கு துப்பாக்கி சுடும் போட்டி நடைபெற்று வருகிறது. ஒவ்வொரு மண்டலத்திலும் முதல் 3 இடங்களை பெறும் அதிகாரிகள் சென்னையில் நடைபெறும் மாநில அளவிலான போட்டியில் பங்கேற்கிறார்கள்.