ஈரோடு மாவட்டத்தில் 13 ஆசிரியர்களுக்கு ‘டாக்டர் ராதாகிருஷ்ணன் விருது’; கலெக்டர் கிருஷ்ணனுண்ணி வழங்கினார்

ஈரோடு

ஈரோடு மாவட்டத்தில் 13 ஆசிரியர்களுக்கு டாக்டர் ராதாகிருஷ்ணன் விருதினை கலெக்டர் கிருஷ்ணனுண்ணி வழங்கினார்.

ஈரோடு கலெக்டர் அலுவலகத்தில் தேசிய ஆசிரியர் தினத்தையொட்டி, மாநில நல்லாசிரியர் விருதான ‘டாக்டர் ராதாகிருஷ்ணன் விருது’ வழங்கும் விழா நேற்று நடந்தது. விழாவுக்கு மாவட்ட கலெக்டர் கிருஷ்ணனுண்ணி தலைமை தாங்கி, மாநில நல்லாசிரியர் விருதுக்கு தேர்வான 13 ஆசிரிய, ஆசிரியைகளை பாராட்டி, டாக்டர் ராதாகிருஷ்ணன் விருது மற்றும் வெள்ளி பதக்கம், ரூ.10 ஆயிரத்திற்கான காசோலையை வழங்கினார்.

இதைத்தொடர்ந்து அவர் பேசும்போது, ‘நம் நாட்டின் 2-வது குடியரசு தலைவர் டாக்டர் ராதாகிருஷ்ணன் பிறந்தநாளான செப்டம்பர் மாதம் 5-ந் தேதியை ஆசிரியர் தினமாக கொண்டாடுகிறோம். இந்தநாளில், ஒவ்வொரு ஆண்டும் சிறப்பாக பணியாற்றிய ஆசிரிய, ஆசிரியைகளை பாராட்டி தமிழக அரசு நல்லாசிரியர் விருதுகள் வழங்கி பெருமைப்படுத்துகிறது. எனவே, ஈரோடு மாவட்டத்தில் இந்த விருது பெறும் 13 ஆசிரிய, ஆசிரியைகள் தங்களை போலவே மாணவர்களும் பல்வேறு விருதுகளை பெறும் வகையில் அவர்களுக்கு முனைப்போடு பாடங்களை கற்பிக்க வேண்டும்’ என்றார்.

அதைத்தொடர்ந்து, சித்தோடு அரசு மேல்நிலை பள்ளிக்கூட தலைமை ஆசிரியர் ரத்தினசபாபதி, குட்டிப்பாளையம் அரசு உயர்நிலை பள்ளிக்கூட பட்டதாரி ஆசிரியர் சந்திரசேகரன், மொடக்குறிச்சி அரசு ஆண்கள் மேல்நிலை பள்ளிக்கூட பட்டதாரி ஆசிரியர் மணிகண்டன், பவானி அரசு மகளிர் மேல்நிலை பள்ளிக்கூட பட்டதாரி ஆசிரியர் பாலகிருஷ்ணன், ஈரோடு ஈ.கே.எம். அப்துல்கனி மதரஸா இஸ்லாமியா உயர்நிலை பள்ளிக்கூட பட்டதாரி ஆசிரியர் சேட்டுமதார்சா, சென்னிமலை ஒன்றியம் சிறுகளஞ்சி ஊராட்சி ஒன்றிய நடுநிலை பள்ளிக்கூட தலைமை ஆசிரியை கல்யாணி, சத்தியமங்கலம் ஒன்றியம் காடகநல்லி ஊராட்சி ஒன்றிய நடுநிலை பள்ளிக்கூட தலைமை ஆசிரியை நம்பிக்கைமேரி, தூக்கநாயக்கன்பாளையம் ஒன்றியம் ஏழூர் ஊராட்சி ஒன்றிய தொடக்க பள்ளிக்கூட இடைநிலை ஆசிரியை சுமதி, அம்மாபேட்டை ஒன்றியம் குருவரெட்டியூர் ஊராட்சி ஒன்றிய தொடக்க பள்ளிக்கூட இடைநிலை ஆசிரியர் ரஞ்சித்குமார், கோபி ஒன்றியம் அவ்வையார்பாளையம் ஊராட்சி ஒன்றிய தொடக்க பள்ளிக்கூட பட்டதாரி ஆசிரியை தீபலெட்சுமி, பெருந்துறை கொங்கு வேளாளர் பதின்ம மெட்ரிக் மேல்நிலை பள்ளிக்கூட முதுகலை ஆசிரியர் ரவிக்குமார், பெருந்துறை மாவட்ட ஆசிரியர் கல்வி மற்றும் பயிற்சி நிறுவன விரிவுரையாளர் சுமதி, மாவட்ட ஆசிரியர் கல்வி மற்றும் பயிற்சி நிறுவன விரிவுரையாளர் புனிதவதி ஆகிய 13 ஆசிரிய, ஆசிரியைகள் மாநில நல்லாசிரியர் விருது பெற்றனர்.

விழாவில், மாவட்ட முதன்மை கல்வி அலுவலர் ராமகிருஷ்ணன், மாவட்ட கல்வி அலுவலர் (பயிற்சி) மான்விழி, மாவட்ட கல்வி அலுவலர்கள் சிவக்குமார் (கோபி), மாதேசன் (ஈரோடு), பழனி (பவானி), அன்பழகன் (சத்தி), ராமன் (பெருந்துறை) உட்பட பலர் கலந்து கொண்டார்கள்.