வீடு புகுந்து திருடிய 3 பேர் கைது

மதுரை பழங்காநத்தம் திருவள்ளுவர் நகர் 2-வது தெருவை சேர்ந்தவர் ஸ்டீபன். இவருடைய மனைவி கரோலின் செல்வி (வயது 48). சம்பவத்தன்று இவர் வீட்டில் தூங்கிக் கொண்டிருந்தார். அப்போது வீட்டிற்குள் புகுந்த மர்ம நபர்கள் பீரோவில் இருந்த ரூ.70 ஆயிரத்தை திருடிச் சென்றனர். இது குறித்து கரோலின் செல்வி சுப்பிரமணியபுரம் போலீசில் புகார் அளித்தார். போலீசார் வழக்குப்பதிவு செய்து விசாரணை நடத்தி, அப்பகுதியில் பொருத்தப்பட்டிருந்த கேமரா பதிவை ஆய்வு செய்தனர். அதில் பணத்தை திருடியது மதுரை வில்லாபுரத்தை சேர்ந்த ஜெப்ரின் நோயல் பாஸ்டின் (21), முகமது கவுஸ் (24), முனியாண்டி புரத்தைச் சேர்ந்த முகேஷ் (22) என தெரியவந்தது. இதை தொடர்ந்து அவர்கள் 3 பேரையும் போலீசார் கைது செய்து பணத்தை மீட்டனர்.