4 பேர் நேரில் ஆஜராக தனிப்படை போலீசார் சம்மன்

தினத்தந்தி 21 Sept 2021 8:26 PM IST (Updated: 21 Sept 2021 8:26 PM IST)

4 பேர் நேரில் ஆஜராக தனிப்படை போலீசார் சம்மன்

ஊட்டி

கோடநாடு கொலை, கொள்ளை வழக்கு தொடர்பாக சந்தோஷ் சாமி, திபு உள்பட 4 பேர் நேரில் ஆஜராக தனிப்படை போலீசார் சம்மன் வழங்கி உள்ளனர்.

கோடநாடு வழக்கு

நீலகிரி மாவட்டம் கோத்தகிரி அருகே முன்னாள் முதல்&அமைச்சர் ஜெயலலிதா, அவரது தோழி சசிகலாவுக்கு சொந்தமான கோடநாடு எஸ்டேட்டில் 24.4.2017ந் தேதி காவலாளி ஓம்பகதூர் கொலை செய்யப்பட்டார்.

மேலும் எஸ்டேட் பங்களாவில் இருந்த பொருட்கள் கொள்ளை அடிக்கப்பட்டது. இது தொடர்பாக கேரளாவை சேர்ந்த, வாளையாறு மனோஜ் உள்பட 10 பேரை கோத்தகிரி போலீசார் கைது செய்தனர். இந்த வழக்கு விசாரணை ஊட்டி செசன்சு கோர்ட்டில் நடந்து வருகிறது.

வழக்கு குறித்து முழு விசாரணை நடத்த 4 வார கால அவகாசம் கோர்ட்டு வழங்கியது. இதையடுத்து 5 தனிப்படைகள் அமைத்து போலீசார் விசாரணையை முடுக்கிவிட்டனர்.

அதன்படி இந்த வழக்கில் அரசு தரப்பு சாட்சிகள், இறந்தவர்களின் உறவினர்களிடம் விசாரணை நடத்தி வருகின்றனர்.

மேலும் ஜாமீனில் உள்ள சயான், சம்சீர்அலி மற்றும் கோடநாடு எஸ்டேட் மேலாளர் நடராஜன், விபத்தில் இறந்த கனகராஜின் (ஜெயலலிதா கார் டிரைவர்) அண்ணன் தனபால், மனைவி, உறவினர்கள், நண்பர்கள் மற்றும் சம்பவத்தன்று பணியில் இருந்த போலீசாரிடம் விசாரணை நடத்தி பதிவு செய்தனர்.

போலீசார் சம்மன்

இதையடுத்து திபு, ஜித்தின்ஜாய் உள்பட 7 பேரிடம் விசாரணை நடத்த திட்டமிட்டனர். இதற்கிடையே கேரளாவில் கொரோனா பாதிப்பு அதிகமாக இருப்பதால் விசாரணைக்கு ஆஜராகுவதில் சிக்கல் உள்ளது.

இதனால் திபு, சதீசன், சந்தோஷ்சாமி, ஜித்தின்ஜாய் ஆகிய 4 பேரின் தரப்பில் வீடியோ கான்பரன்ஸ் (காணொலி காட்சி) மூலம் விசாரணை நடத்த கோரி மேற்கு மண்டல போலீஸ் ஐ.ஜி. சுதாகருக்கு மனு அனுப்பினர்.

இந்த நிலையில் வழக்கில் தொடர்புடைய சந்தோஷ்சாமி, மனோஜ்சாமி ஆகிய 2 பேர் ஊட்டி பழைய போலீஸ் சூப்பிரண்டு அலுவ லகத்தில் நடைபெறும் விசாரணைக்கு இன்று (புதன்கிழமை) ஆஜராக வேண்டும் என்று ஊட்டியில் இருந்து போலீசார் கேரளாவுக்கு நேரடியாக சென்று சம்மன் வழங்கி உள்ளனர்.

விசாரணை

இதற்காக அவர்கள், 2 பேரும் கொரோனா பரிசோதனை செய்து பாதிப்பு இல்லை என்ற நெகட்டிவ் சான்றிதழை காண்பித்து இன்று (புதன்கிழமை) நீலகிரிக்கு வர இருக்கின்றனர். அவர்கள், 2 பேரிடம் இன்று போலீசார் விசாரணை நடத்துகின்றனர்.

இதே போல் திபு, ஜித்தின்ஜாய் ஆகிய 2 பேருக்கும் நாளை மறுநாள் (வெள்ளிக்கிழமை) விசாரணைக்கு ஆஜராக வேண்டும் என்று போலீசார் சம்மன் வழங்கி உள்ளனர். அவர்களிடம் வழக்கு தொடர்பாக பல கேள்விகளை கேட்டு விவரங்களை போலீசார் பதிவு செய்ய உள்ளனர்.

தினத்தந்தி

Related Tags :