திருக்கார்த்திகை தீபத் திருவிழா கொடியேற்றத்துடன் தொடங்கியது

திருப்பரங்குன்றம்,
திருப்பரங்குன்றம் முருகன் கோவிலில் திருக்கார்த்திகை தீபத் திருவிழா கொடியேற்றத்துடன் தொடங்கியது. அரோகரா கோஷங்கள் முழங்க பக்தர்கள் சாமி தரிசனம் செய்தனர்
திருவிழாவின் முதல்நாள் நிகழ்ச்சியாக காலை 9.30 மணிக்கு உற்சவர் சன்னதியில் தெய்வானையுடன் சுப்பிரமணியசாமிக்கு விசேஷ பூஜையும், சர்வ அலங்காரமும் நடந்தது. இதனையடுத்து மேளதாளங்கள் முழங்க உற்சவர் சன்னதியில் இருந்து தெய்வானையுடன் சுப்பிரமணிய சுவாமி வெள்ளி சிம்மாசனத்தில் அமர்ந்து புறப்பட்டு கம்பத்தடி மண்டபத்தில் எழுந்தருளினார். அங்கு சாமி, அம்பாள் அருள் பார்வையில் தங்கமுலாம் பூசப்பட்ட கம்பத்தில் பன்னீர், புனிதநீர் உள்ளிட்ட பல்வேறு வாசனை திரவியங்கள் கொண்டு அபிஷேகம் நடந்தது.
திருக்கார்த்திகை தீபதிருவிழாவையொட்டி தினமும் காலையில் தங்க சப்பரத்திலும், இரவு 7 மணியளவில் தினமும் வெவ்வேறு வாகனத்திலுமாக சாமி புறப்பாடு நடப்பது வழக்கமாகும்.
ஆனால் ஊரடங்கு காரணமாக பல்வேறு வாகனங்களில் சாமி புறப்பாடு தவிர்க்கப்பட்டுஉள்ளது. கோவிலுக்குள்ளே உள்திருவிழா நடைபெறுவதால் காலை, மாலை ஆகிய இருவேளையிலுமாக மரசிம்மாசனத்தில் அம்பாளுடன் சாமி புறப்பட்டு திருவாட்சி மண்டபத்தை வலம் வருகிறார். திருவிழாவின் முக்கிய நிகழ்ச்சியாக வருகிற 18 -ந்தேதி (வியாழக்கிழமை) இரவு 7.45 மணி முதல் இரவு 8.15 மணிக்குள் முருகப்பெருமானுக்கு பட்டாபிஷேகம் நடக்கிறது