சிவகிரி அருகே பயங்கர விபத்து லாரி-கார் மோதல்; தாய்-மகள் உள்பட 5 பேர் சாவு பழனி சென்றுவிட்டு வீட்டுக்கு திரும்பியவர்களுக்கு நேர்ந்த சோகம்

சிவகிரி

சிவகிரி அருகே லாரியும், காரும் பயங்கரமாக மோதிக்கொண்ட விபத்தில் தாய்-மகள் உள்பட 5 பேர் பரிதாபமாக இறந்தனர். பழனிக்கு சென்று சாமி தரிசனம் செய்துவிட்டு வீடு திரும்பியபோது இந்த சோகம் நேர்ந்தது. 

ஈரோடு மாவட்டம் மொடக்குறிச்சி அருகே உள்ள ஈஞ்சம்பள்ளி முத்துகவுண்டன்பாளையம் பி.கே.எஸ்.நகரை சேர்ந்தவர் மோகன்குமார் (வயது 27). இவருடைய மனைவி தேன்மொழி (20). இவருடைய உறவினர் ஈஞ்சம்பள்ளி தானத்துபாளையத்தை சேர்ந்தவர் மோகனசுந்தரம். இவரின் மனைவி தெய்வானை (55). இவர்களது மகள் மஞ்சுளா என்கிற புவனேஸ்வரி (19).

இந்தநிலையில் மோகன்குமார், தேன்மொழி, இவரது தம்பி குமரேசன் (17), தெய்வானை, மஞ்சுளா மற்றும் இவர்களது உறவினர்களான மொடக்குறிச்சி அருகே குளூரை சேர்ந்த சக்திவேலின் மனைவி அருக்காணி (50), தானத்துப்பாளையத்தை சேர்ந்த முத்துசாமி (40) ஆகியோர் நேற்று அதிகாலை வாடகை கார் மூலமாக பழனி கோவிலுக்கு புறப்பட்டனர்.

அந்த காரை மொடக்குறிச்சி அருகே மஞ்சகாட்டுவலசு பகுதியை சேர்ந்த படையப்பா என்கிற பிரகாஷ் (26) என்பவர் ஓட்டினார். அவர்கள் பழனிக்கு சென்று சாமி தரிசனம் செய்துவிட்டு மீண்டும் ஈஞ்சம்பள்ளி நோக்கி திரும்பினார்கள்.

கார் சிவகிரி அருகே பாரப்பாளையம் பஸ் நிறுத்தம் பகுதியில் நேற்று பகல் 12.30 மணி அளவில் சென்று கொண்டு இருந்தது. 

அப்போது ஈரோட்டில் இருந்து சிமெண்டு பாரம் ஏற்றிக்கொண்டு லாரி ஒன்று வந்தது. இந்தநிலையில் லாரியும், காரும் கண்இமைக்கும் நேரத்தில் நேருக்கு நேர் பயங்கரமாக மோதிக்கொண்டன.

இந்த விபத்தில் காரின் மேற்கூரை முழுவதும் சேதமடைந்தது. மேலும், கார் முழுவதும் அப்பளம்போல் நொறுங்கியது. இதனால் காரில் இருந்தவர்கள் இடிபாடுகளுக்குள் சிக்கி அலறி துடித்தார்கள். சிலர் காரில் இருந்து வெளியே தூக்கி வீசப்பட்டனர். 

இதில் கார் டிரைவர் படையப்பா இருக்கையில் இருந்தபடியே இடிபாடுகளில் சிக்கி உயிரிழந்தார். மேலும், தேன்மொழி, தெய்வானை, அவரது மகள் மஞ்சுளா, அருக்காணி ஆகிய 4 பெண்களும் சம்பவ இடத்திலேயே பரிதாபமாக இறந்தார்கள். 

அந்த வழியாக வாகனங்களில் சென்றவர்கள் விரைந்து வந்து இடிபாடுகளில் சிக்கி இருந்தவர்களை மீட்கும் முயற்சியில் ஈடுபட்டார்கள். இதில் குமரேசன், முத்துசாமி, மோகன்குமார் ஆகியோர் படுகாயங்களுடன் உயிருக்கு போராடி கொண்டு இருந்தார்கள். அவர்கள் 3 பேரும் மீட்கப்பட்டு சிகிச்சைக்காக ஈரோடு அரசு ஆஸ்பத்திரிக்கு ஆம்புலன்சில் கொண்டு செல்லப்பட்டார்கள். 

அங்கு அவர்களுக்கு டாக்டர்கள் தீவிர சிகிச்சை அளித்து வருகிறார்கள்.

இதுபற்றிய தகவல் கிடைத்ததும் சிவகிரி போலீசார் சம்பவ இடத்துக்கு விரைந்து சென்றனர். அங்கு விபத்தில் பலியான படையப்பா, தேன்மொழி, தெய்வானை, மஞ்சுளா, அருக்காணி ஆகியோரின் உடல்களை கைப்பற்றி பிரேத பரிசோதனைக்காக பெருந்துறையில் உள்ள அரசு மருத்துவ கல்லூரி ஆஸ்பத்திரிக்கு அனுப்பி வைத்தனர்.மேலும் விபத்துக்கு காரணமான லாரியின் டிரைவர் ஈரோடு காசிபாளையத்தை சேர்ந்த மணிகண்டன் (41) மீது சிவகிரி போலீசார் வழக்குப்பதிவு செய்து விசாரணை நடத்தி வருகிறார்கள்.

 பழனி கோவிலுக்கு சென்றுவிட்டு வீட்டுக்கு திரும்பியபோது நடந்த விபத்தில், தாய்-மகள் உள்பட 5 பேர் பலியான சம்பவம் சம்பந்தப்பட்டவர்களின் உறவினர்களிடையே பெரும் சோகத்தை ஏற்படுத்தியது.