கூடுவாஞ்சேரியில் இறந்து கிடந்த மாட்டின் மீது மொபட் மோதி கல்லூரி மாணவி பலி

வண்டலூர், 

செங்கல்பட்டு மாவட்டம் கூடுவாஞ்சேரி கபாலி நகர் 2-வது மெயின் ரோடு பகுதியை சேர்ந்தவர் ராஜசேகரன். இவரது மகள் விஜயலட்சுமி (வயது 18), இவர் கல்வாய் கிராமத்தில் உள்ள தனியார் கல்லூரியில் பி.காம் முதலாமாண்டு படித்து வந்தார். இதே கல்லூரியில் நந்திவரம் பகுதியை சேர்ந்த இவரது தோழியான வசுந்தரா (19), என்பவர் பி.ஏ. முதலாமாண்டு படித்து வருகிறார்.

இவர்கள் இருவரும் நேற்று காலை கூடுவாஞ்சேரியில் இருந்து கல்வாயில் உள்ள கல்லூரிக்கு மொபட்டில் சென்று கொண்டிருந்தனர்.

பாண்டூர் அருகே செல்லும் போது திடீரென சாலையில் நடுவே இறந்து கிடந்த மாட்டின் மீது மொபட் மோதியது. இதில் மொபட்டில் இருந்து கீழே விழுந்த விஜயலட்சுமி பலத்த காயம் அடைந்தார். அவரது தோழி வசுந்தரா லேசான காயமடைந்தார்.

இதனை பார்த்த அந்த பகுதி சேர்ந்த பொதுமக்கள் இருவரையும் மீட்டு செங்கல்பட்டு அரசு ஆஸ்பத்திரிக்கு அனுப்பி வைத்தனர். அங்கு விஜயலட்சுமியை பரிசோதனை செய்த டாக்டர் அவர் ஏற்கனவே இறந்து விட்டதாக தெரிவித்தனர்.

இந்த விபத்து குறித்து கூடுவாஞ்சேரி போலீசார் வழக்குப்பதிவு செய்து விசாரித்து வருகின்றனர்.