சத்தியமங்கலம் மார்க்கெட்டில் மல்லிகைப்பூ கிலோ ரூ.1,575-க்கு ஏலம்

சத்தியமங்கலம்

சத்தியமங்கலத்தில் உள்ள கரட்டூர் ரோட்டில் பூ மார்க்கெட் இயங்கி வருகிறது. இந்த மார்க்கெட்டில் தினமும் காலை 7 மணி முதல் மதியம் 2 மணி வரை பூக்கள் ஏலம் நடைபெறும். அதன்படி இந்த மார்க்கெட்டில் பூக்கள் ஏலம் நேற்று நடந்தது. 

இந்த ஏலத்துக்கு சத்தியமங்கலம் மற்றும் அதன் சுற்றுவட்டார பகுதிகளில் இருந்து ஏராளமான விவசாயிகள் 4 டன் பூக்களை விற்பனைக்காக கொண்டு வந்திருந்தனர். நேற்றைய ஏலத்தில் மல்லிகைப்பூ கிலோ ஒன்று ரூ.1,575-க்கும், முல்லை ரூ.680-க்கும், காக்கடா ரூ.450-க்கும், செண்டுமல்லி ரூ.105-க்கும், பட்டுப்பூ ரூ.92-க்கும், ஜாதிமல்லி ரூ.600-க்கும், கனகாம்பரம் ரூ.1,100-க்கும், சம்பங்கி ரூ.30-க்கும், அரளி ரூ.400-க்கும், துளசி ரூ.40-க்கும், செவ்வந்தி  ரூ.200-க்கும் ஏலம் போனது.