வனவிலங்குகள் வேடமிட்டு விழிப்புணர்வு ஏற்படுத்திய அரசு பள்ளி மாணவர்கள்

ஈரோடு அருகே உள்ள நாதகவுண்டன்பாளையம் பகுதியில் ஊராட்சி ஒன்றிய நடுநிலைப்பள்ளிக்கூடம் உள்ளது. இங்கு விழிப்புணர்வு கலை நிகழ்ச்சிகள் நடத்தப்பட்டன. இதில் லக்காபுரம் அரசு மேல்நிலைபள்ளிக்கூடத்தில் படிக்கும் மாணவ-மாணவிகள் வன விலங்குகள் வேடமிட்டு விழிப்புணர்வு நாடகம் நடத்தினார்கள். வனவிலங்குகளை நேசிப்போம் -பாதுகாப்போம் என்ற தலைப்பில் நடந்த இந்த நிகழ்ச்சியில் மாணவ-மாணவிகள் பல்வேறு வன விலங்குகளின் வேடத்திலும், மரம் வேடத்திலும் நடித்தனர். பார்வையாளர்கள் சிரிக்கவும், சிந்திக்கவும் கூடிய வகையில் தங்கள் நடிப்பாற்றல் மூலம் விழிப்புணர்வு ஏற்படுத்தினார்கள்.

இந்த கலைக்குழுவினை லக்காபுரம் பள்ளிக்கூட ஓவிய ஆசிரியர் சிவக்குமார் ஒருங்கிணைந்து, மாணவ-மாணவிகளுக்கு பயிற்சிகள் அளித்து அழைத்து வந்தார். அவர் கூறும்போது, நாட்டுப்புற கலைகளை ஊக்கப்படுத்த வேண்டும் என்று தமிழக அரசு உத்தரவிட்டு உள்ளது. அதை பின்பற்றி, கிராமிய கலைகளை மீட்டு எடுக்கவும், மாணவ-மாணவிகள் அதைப்பற்றி தெரிந்து கொள்ளவும், தங்கள் ஆற்றல் மூலம் பொதுமக்களுக்கு விழிப்புணர்வு ஏற்படுத்தவும் முயற்சி செய்கிறோம் என்றார்.

முன்னதாக பள்ளிக்கூட தலைமை ஆசிரியை சாருலதா தலைமை தாங்கி வரவேற்றார். முடிவில் ஆசிரியர் தாமஸ் ஆண்டனி நன்றி கூறினார்.