கோவை புலியகுளம் விநாயகர் கோவில் பகுதி எப்போதும் போக்குவரத்து நெருக்கடியால் பரபரப்பாக காணப்படும். இது ராமநாதபுரம், சவுரிபாளையம், லட்சுமி மில் சிக்னல் உள்ளிட்ட இடங்களின் சந்திப்பு பகுதியாக உள்ளது. ஆனால் இங்கு போக்குவரத்து சிக்னல் இல்லாததால் வாகன ஓட்டிகள் போக்குவரத்து நெருக்கடியில் சிக்கி தவிக்கின்றனர். இதன் காரணமாக விபத்து ஏற்படும் அபாயம் உள்ளது. எனவே இங்கு சிக்னல் அமைக்க நடவடிக்கை எடுக்க வேண்டும்.

கோவை சாய்பாபா காலனி மேட்டுப்பாளையம் சாலையில் இருந்து பாரதி பூங்கா செல்லும் சாலை சந்திப்பு பகுதியில் மீனாட்சி நகர்புற ஆரம்ப சுகாதார நிலையத்திற்கு செல்வதற்காக வழிகாட்டி பலகை ஒன்று வைக்கப்பட்டு இருந்தது. கடந்த சில நாட்களாக அந்த வழிகாட்டி பலகை உடைந்து கீழே தொங்கி கொண்டு இருக்கிறது. பொதுமக்களுக்கு வழியை காட்டிய வழிகாட்டி பலகை தற்போது வழிகாட்ட முடியாத நிலையில் உள்ளது. இதனை உடனடியாக சரி செய்ய வேண்டும்.

கூடலூரில் இருந்து பந்தலூருக்கு குறைந்த எண்ணிக்கையிலான பஸ்களே இயக்கப்படுகிறது. இதனால் சுற்றுவட்டார கிராம மக்கள் கடுமையாக பாதிக்கப்பட்டு வருகின்றனர். குறிப்பாக மதிய வேளையில் பஸ்கள் இல்லாததால் கூடலூர் பஸ் நிலையத்தில் நீண்ட நேரம் பயணிகள் காத்திருக்க வேண்டிய நிலை உள்ளது. எனவே கூடலூரில் இருந்து பந்தலூருக்கு கூடுதல் பஸ்கள் இயக்க நடவடிக்கை எடுக்க வேண்டும்.