‘தினத்தந்தி’ புகார் பெட்டி: மக்கள் குறைகள் தொடர்பான பதிவுகள்

திருவள்ளூர் மாவட்டம் ஆவடி வீட்டு வசதி வாரியம் செக்டார் 18-வது மெயின் ரோட்டில் பாதாள சாக்கடை மூடி சேதமடைந்து ஆபத்தான நிலையில் இருப்பது பற்றி ‘தினத்தந்தி’ புகார் பெட்டியில் செய்தி வெளியிடப்பட்டது. இதையடுத்து ஆவடி மாநகராட்சி அதிகாரிகள் உடனடியாக நடவடிக்கை மேற்கொண்டு பாதாள சாக்கடைக்கு புதிய மூடி பொருத்தியுள்ளனர்.

செங்கல்பட்டு மாவட்டத்தில் உள்ள கன்னிவாக்கம் கிராமத்தில் ‘தினத்தந்தி’ செய்தி எதிரொலியால் சேதமான மின்கம்பம் அகற்றப்பட்டு புதிய மின்கம்பம் பொருத்தப்பட்டது. ஆனால் மின்கம்பத்தில் இருந்த மின்விளக்கும் சேர்த்து அகற்றப்பட்டதால் அப்பகுதி மக்களின் வேதனையும் பதிவு செய்யப்பட்டது. இதையடுத்து அங்கு மீண்டும் மின்விளக்கு பொருத்தப்பட்டு உள்ளது.

சென்னை கொளத்தூர் அன்னை இந்திரா தெருவில் போக்குவரத்துக்கு இடையூறாக நடுத்தெருவில் மின்கம்பம் இருப்பது குறித்து ‘தினத்தந்தி’ புகார் பெட்டியில் படத்துடன் சுட்டிக்காட்டப்பட்டது. இதையடுத்து மின்வாரியம் சார்பில் உடனடியாக அந்த கம்பம் அகற்றப்பட்டு உள்ளது. தங்களது நீண்ட கால கோரிக்கை நிறைவேறியதால் அப்பகுதி மக்கள் மகிழ்ச்சி அடைந்துள்ளனர். மின்வாரியத்துக்கும், ‘தினத்தந்தி’க்கும் நன்றி தெரிவித்து உள்ளனர்.

சென்னை திருவொற்றியூர் காமராஜர் நகர் 2-வது தெருவில் ஒரு மாதமாகவே கழிவுநீர் தேங்கி கிடக்கிறது. இக்கழிவுநீரை கடந்தே வெளியே செல்ல வேண்டிய நிலை இருக்கிறது. தேங்கிய கழிவுநீரால் துர்நாற்றம் வீசுவதுடன், கொசுக்களின் படையெடுப்பும் மிகுதியாக இருக்கிறது. இதனால் நோய் பரவும் சூழல் உருவாகி இருக்கிறது. எங்கள் நலன் காக்க நடவடிக்கை எடுக்கப்படுமா?

- காமராஜர் நகர் 2-வது தெரு மக்கள்.