மாசித்திருவிழா கொடியேற்றம்

பழனி:
பழனி கிழக்கு ரத வீதியில் முருகன் கோவிலின் உப கோவிலாக விளங்கும் மாரியம்மன் கோவில் உள்ளது. இந்த கோவிலில் மாசித்திருவிழா கடந்த மாதம் 28-ந்தேதி முகூர்த்தக்கால் நடும் நிகழ்ச்சியுடன் தொடங்கியது. விழாவின் 12-ம் நாளான நேற்று இரவு மாரியம்மன் சன்னதியில் 5 கலசங்கள் வைத்து விநாயகர் பூஜை, சிறப்பு யாகம் மற்றும் காப்புக்கட்டுதல் நிகழ்ச்சி நடந்தது. பின்னர் கொடிப்படம் கோவிலை வலம் வந்து கொடிமரத்தில் கொடியேற்றம் நடைபெற்றது.
அப்போது கொடிமரத்திற்கு வேத மந்திரங்கள் முழங்க தீபாராதனை நடைபெற்றது. கொடியேற்ற நிகழ்ச்சியை காண அம்மன் சிறப்பு அலங்காரத்தில் கொடி மண்டபத்தில் எழுந்தருளினார். பின்னர் மாரியம்மன், கோவில் உள்பிரகாரத்தில் வலம் வருதல், அக்னி சட்டி எடுத்து கம்பத்தில் வைத்தல் மற்றும் தீபாராதனை நடைபெற்றது. இதையடுத்து மாரியம்மன் தங்க மயில் வாகனத்தில் எழுந்தருளி வீதி உலா வந்தார்.