வழிப்பறியில் கைதான 5 பேர் மீது குண்டர் சட்டம் பாய்ந்தது; தாம்பரம் மாநகர கமிஷனர் உத்தரவு

காஞ்சீபுரம் மாவட்டம் படப்பை அடுத்த வஞ்சுவாஞ்சேரி பகுதியை சேர்ந்தவர் வினோத் (வயது 20). இவர் நாவலூர் குடியிருப்பு பகுதியை சேர்ந்த சுரேஷ் (20), ராஜீ (19), ஹரிஷ் (25), ராஜேஷ் (20) மற்றும் மண்ணிவாக்கம் பகுதியை சேர்ந்த பார்த்திபன் (25) ஆகிய 5 பேருடன் சேர்ந்து படப்பை ஆரம்பாக்கம் அருகே வழிப்பறி சம்பவத்தில் ஈடுபட்டு வந்தார்.

இவர்கள் 6 பேரையும் கடந்த 12-ந் தேதியன்று மணிமங்கலம் போலீசார் கைது செய்து தாம்பரம் கோர்ட்டில் ஆஜர்படுத்தி சிறையில் அடைத்தனர். இவர்களில் வினோத், சுரேஷ், ராஜீ, பார்த்திபன், மற்றும் ஹரிஷ், ஆகிய 5 பேர் மீதும் மணிமங்கலம், ஒரகடம், சென்னை, கூடுவாஞ்சேரி, உள்ளிட்ட போலீஸ் நிலையங்களில் பல்வேறு வழக்குகள் உள்ளது. இந்த நிலையில் 5 பேரையும் குண்டர் தடுப்பு சட்டத்தின் கீழ் சிறையில் அடைக்க தாம்பரம் மாநகர போலீஸ் கமிஷனர் ரவி உத்தரவிட்டுள்ளார்.