காத்திருப்பு போராட்டத்தில் ஈடுபட முயன்ற மலைக் கிராம மக்கள்

கடமலைக்குண்டு: 

தேனி மாவட்டம், கடமலை-மயிலை ஒன்றியம் வெள்ளிமலை வனப்பகுதியில் அரசரடி, இந்திராநகர், காந்திகிராமம், பொம்மராஜபுரம் உள்ளிட்ட மலைக்கிராமங்கள் உள்ளன. இந்த வனப்பகுதி புலிகள் காப்பகமாக மாற்றப்பட்ட பின்பு வனத்துறையினர் மலைக்கிராம மக்களுக்கு பல்வேறு கட்டுப்பாடுகளை விதித்தனர். இதனால் அவர்களின் வாழ்வாதாரம் கடுமையாக பாதிக்கப்பட்டது. இதற்கிடையே கடந்த 2 ஆண்டுகளுக்கு முன்பு தொடர்ந்த பொதுநல வழக்கில் வனப்பகுதியில் இருந்து கிராம மக்கள் வெளியேற வேண்டும் என்று ஐகோர்ட்டு உத்தரவிட்டது. இந்த உத்தரவை எதிர்த்து அப்பகுதி மக்கள் ஐகோர்ட்டில் வழக்கு தொடர்ந்துள்ளனர். அந்த வழக்கு தற்போது நிலுவையில் உள்ளது.  

இந்த நிலையில் தற்போது இலவம் பஞ்சு சீசன் தொடங்கியுள்ளது. இந்த இலவம் காய்களை மரங்களில் இருந்து பறித்து இலவம் பஞ்சை விற்பனை செய்ய வனத்துறையினர் சில கட்டுப்பாடுகளை விதித்துள்ளனர். இதனை கண்டித்து மலைக்க்கிராம மக்கள் காத்திருப்பு போராட்டத்தில் ஈடுபட கடமலைக்குண்டு புதிய பஸ்நிலையத்துக்கு திரண்டு வந்தனர். அங்கு கூடுதல் போலீஸ் சூப்பிரண்டு சக்திவேல் தலைமையில் 3 போலீஸ் துணை சூப்பிரண்டுகள், 6 இன்ஸ்பெக்டர்கள் உள்பட 100-க்கும் மேற்பட்ட போலீசார் பாதுகாப்பு பணிக்காக குவிக்கப்பட்டனர். இதனால் அங்கு பரபரப்பு ஏற்பட்டது.  

பின்னர் அவர்கள் புதிய பஸ் நிலையத்திற்குள் சென்று காத்திருப்பு போராட்டத்தில் ஈடுபட முயன்றனர். அவர்களை போலீசார் தடுத்து நிறுத்தினர். பின்னர் அவர்களிடம், போலீசார் பேச்சுவார்த்தை நடத்தினர். அப்போது ஐகோர்ட்டு தீர்ப்பு மலைக்கிராம மக்களுக்கு எதிராக வரும் பட்சத்தில் தமிழக அரசு சார்பில் சுப்ரீம் கோர்ட்டில் மேல்முறையீடு செய்ய வேண்டும். மேகமலை, தும்மக்குண்டு உள்ளிட்ட 9 ஊராட்சிகளை சேர்ந்த விவசாயிகளுக்கு பட்டா வழங்க வேண்டும். கோர்ட்டு வழக்கு முடியும் வரை மலைக்கிராம மக்கள் வழக்கமான விவசாய பணிகளில் ஈடுபட நடவடிக்கை எடுக்க வேண்டும் என்பன உள்பட பல்வேறு கோரிக்கைகளை வலியுறுத்தினர். 

அப்போது பெண்கள் சிலர் புதிய பஸ் நிலையம் முன்பு தர்ணாவில் ஈடுபட தொடங்கினர். இதனையடுத்து போலீசார் போராட்டத்தில் ஈடுபட்ட பெண்கள் உள்பட 115 பேரை கைது செய்து கடமலைக்குண்டுவில் உள்ள தனியார் திருமண மண்டபத்தில் அடைத்தனர். பின்னர் அவர்கள் மாலையில் விடுவிக்கப்பட்டனர்.