காஞ்சீபுரம் ஏகாம்பரநாதர் 63 நாயன்மார்களுடன் வீதியுலா

63 நாயன்மார்கள் வீதியுலா

உலக புகழ்பெற்ற பஞ்சபூத ஸ்தலங்களில் மண் ஸ்தலமாக விளங்கும் காஞ்சீபுரம் ஏலவார்குழலி உடனுறை ஏகாம்பரநாதர் கோவிலில், ஆண்டுதோறும் பங்குனி மாத திருவிழா வெகு விமரிசையாக நடைபெறும். அந்த வகையில், இந்த ஆண்டுக்கான பிரம்மோற்சவ விழா கடந்த 8-ந் தேதி அன்று கொடியேற்றத்துடன் தொடங்கியது. அன்று முதல் காலை, மாலை இருவேளைகளிலும் ஏலவார்குழலியோடு, ஏகாம்பரநாதர் வெவ்வேறு வாகனங்களில் எழுந்தருளி பக்தர்களுக்கு காட்சியளித்து வருகிறார்.

அந்த வகையில் முக்கிய திருவிழாவாக 6-ம் நாளான நேற்று ஏலவார்குழலி உடனுறை ஏகாம்பரநாதர், 63 நாயன்மார்களுக்கு அபிஷேக ஆராதனைகள் நடைபெற்றது. அதனை தொடர்ந்து ஏகாம்பரநாதர் உற்சவர், ஏலவார்குழலி அம்பாளுடன் 63 நாயன்மார்களும் ஒருவர் பின் ஒருவராக அணிவகுத்து 4 ராஜ வீதிகளில் வீதியுலா வந்து பக்தர்களுக்கு காட்சி அளித்தனர்.

தீர்த்தவாரி திருவிழா

63 நாயன்மார்கள் வீதியுலாவையொட்டி ஏராளமான பக்தர்கள் காஞ்சீபுரம் வருகை தந்து சாமி தரிசனம் செய்தனர். இரவு வெள்ளி திருத்தேர் திருவிழா நடைபெற்றது.

முக்கிய விழாவாக வருகிற 18-ந் தேதி ஏலவார்குழலி சமேத ஏகாம்பரநாதர் பங்குனி உத்திர திருக்கல்யாண வைபவமும், இரவு புண்ணியகோடி விமானத்தில் எழுந்தருளி, 20-ந் தேதி தீ ர்த்தவாரி திருவிழாவும், 21-ந் தேதி 108 கலசாபிசேஷகமும் நடைபெறுகிறது.

விழா ஏற்பாடுகளை கோவில் செயல் அலுவலர் என். தியாகராஜன், முன்னாள் மேலாளர் சீனிவாசன் மற்றும் கோவில் பணியாளர்கள், அர்ச்சகர்கள் செய்து வருகின்றனர்.