பட்டா மாற்றம் செய்ய முடியாமல் பொதுமக்கள் தவிப்பு

வெளிப்பாளையம்:-

நாகையில் இணையதள சேவை கோளாறு காரணமாக பட்டா மாற்றம் செய்ய முடியாமல் பொதுமக்கள் தவித்து வருகிறார்கள். 

நாகை பகுதியில் உள்ள மாவட்ட கலெக்டர் அலுவலகம், தாலுகா அலுவலகம், நகராட்சி அலுவலகம், தொடக்க வேளாண்மை கூட்டுறவு வங்கிகள் உள்ளிட்ட இடங்களில் இ-சேவை மையம் இயங்கி வருகிறது. இந்த இ-சேவை மையம் மூலம் இருப்பிடச்சான்று, வருமானச் சான்று, சாதி சான்றிதழ் உள்ளிட்ட பல்வேறு வகையான சான்றிதழ்களை பொதுமக்கள் இணையதளம் மூலம் விண்ணப்பித்து பெற்று வருகின்றனர்.

இந்த நிலையில் நாகை பகுதியில் உள்ள அரசு அலுவலகங்களில் இயங்கும் இ-சேவை மையங்களில் இணையதள சேவை (சர்வர்) கோளாறு காரணமாக பட்டா மாற்றம், உட்பிரிவு பட்டா மாற்றம் செய்ய முடியாமல் பொதுமக்கள் தவித்து வருகிறார்கள். 

கடந்த ஒரு வாரத்துக்கும் மேலாக இந்த நிலை நீடிப்பதாக பொதுமக்கள் கவலை தெரிவிக்கின்றனர். மேலும் இணையதள கோளாறால் இ- சேவை மைய ஊழியர்களுடன் பொதுமக்கள் வாக்குவாதத்தில் ஈடுபடுவதும் நடக்கிறது. 

எனவே சம்பந்தப்பட்ட அதிகாரிகள் உடனடியாக நடவடிக்கை எடுத்து இணையதள சேவை கோளாறை சரிசெய்து பட்டா மாற்றம், உட்பரிவு மாற்றம் செய்ய உரிய நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.