நாமக்கல் மண்டலத்தில் முட்டை விலை 25 காசுகள் உயர்வு 475 காசுகளாக நிர்ணயம்

நாமக்கல்:

நாமக்கல் மண்டலத்தில் முட்டை கொள்முதல் விலை 25 காசுகள் உயர்ந்து, 475 காசுகளாக நிர்ணயம் செய்யப்பட்டு உள்ளது.

நாமக்கல் மண்டலத்தில் முட்டை கொள்முதல் விலை 450 காசுகளாக இருந்து வந்தது. இந்த நிலையில் நேற்று நாமக்கல்லில் நடந்த தேசிய முட்டை ஒருங்கிணைப்பு குழு கூட்டத்தில் அதன் விலையை அதிரடியாக 25 காசுகள் உயர்த்த முடிவு செய்தனர். எனவே முட்டை விலை 475 காசுகளாக அதிகரித்துள்ளது.

பிற மண்டலங்களில் முட்டை விலை காசுகளில் வருமாறு:-

சென்னை-490, ஐதராபாத்-455, விஜயவாடா-465, மைசூரு-475, மும்பை-510, பெங்களூரு-470, கொல்கத்தா-535, டெல்லி-448.

கறிக்கோழி கிலோ ரூ.130-க்கு விற்பனை செய்யப்பட்டு வந்தது. நேற்று பல்லடத்தில் நடந்த கறிக்கோழி ஒருங்கிணைப்பு குழு கூட்டத்தில் அதன் விலையை கிலோவுக்கு ரூ.2 உயர்த்த முடிவு செய்தனர். எனவே கறிக்கோழி விலை கிலோ ரூ.132 ஆக அதிகரித்து உள்ளது. முட்டைக்கோழி கிலோ ரூ.100-க்கு விற்பனை செய்யப்பட்டு வருகிறது. அதன் விலையில் மாற்றம் செய்யப்படவில்லை.

பிற மண்டலங்களில் முட்டை கொள்முதல் விலை உயர்ந்து வருவதால், அதற்கு தகுந்தாற்போல் நாமக்கல் மண்டலத்திலும் முட்டையின் கொள்முதல் விலை உயர்த்தப்பட்டு இருப்பதாக பண்ணையாளர்கள் தெரிவித்தனர். தமிழகம் முழுவதும் பரவலாக கோடை மழை பெய்து வருவதால், பொதுமக்கள் இடையே முட்டை நுகர்வு அதிகரித்து இருப்பதும் விலை உயர்வுக்கு ஒரு காரணம் என கூறப்படுகிறது.

நாமக்கல் மண்டலத்தில் கடந்த 10 நாட்களில் முட்டை கொள்முதல் விலை 110 காசுகள் உயர்ந்து இருப்பதால் பண்ணையாளர்கள் மகிழ்ச்சி அடைந்துள்ளனர்.