மத்திய மந்திரி நிதின் கட்காரியுடன் காங்.தலைவர் அகமது படேல் திடீர் சந்திப்பு

புதுடெல்லி,

காங்கிரஸ் மூத்த தலைவரும், சோனியா காந்தியின் அரசியல் ஆலோசகருமான அகமது படேல் எம்.பி. டெல்லியில் மத்திய போக்குவரத்து துறை மந்திரி நிதின் கட்காரியை நேற்று திடீரென நேரில் சந்தித்து பேசினார்.

மராட்டிய மாநிலத்தில் ஆட்சி அமைப்பது தொடர்பாக பா.ஜ.க. மற்றும் சிவசேனா இடையே கடும் இழுபறி நீடித்து வரும் நிலையில், இந்த சந்திப்பு அரசியல் முக்கியத்துவம் வாய்ந்ததாக கருதப்பட்டது.

ஆனால் இது அரசியல் நிமித்தமான சந்திப்பு இல்லை என்றும், குஜராத் மாநிலத்தில் கிடப்பில் போடப்பட்டுள்ள சாலைப்பணிகள் மற்றும் உள்கட்டமைப்புகளை மேம்படுத்துவது குறித்து நிதின் கட்காரியிடம், அகமது படேல் வலியுறுத்தியதாகவும் கூறப்படுகிறது.