மராட்டியத்தில் ஆட்சி அமைக்காவிட்டால் காங்கிரஸ் கட்சியே இல்லாமல் போய்விடும் - மாநில தலைவர்கள் எச்சரிக்கை

புதுடெல்லி,

மராட்டிய மாநிலத்தில் பா.ஜனதாவுடன் விரிசல் ஏற்பட்டதும், தேசியவாத காங்கிரஸ், காங்கிரஸ் ஆதரவுடன் ஆட்சி அமைக்க சிவசேனா முயற்சி செய்தது. ஆனால், காங்கிரஸ், தேசியவாத காங்கிரஸ் கட்சிகளின் ஆதரவு கடிதம் கிடைக்காததால் சிவசேனாவால் ஆட்சி அமைக்க முடியாமல் போனது.

இந்தநிலையில் காங்கிரஸ், தேசியவாத காங்கிரஸ் கட்சிகள் கடைசி நேரத்தில் பின்வாங்கியது ஏன்? என்பது குறித்து பரபரப்பு தகவல்கள் வெளியாகின. இதில் கொள்கை ரீதியில் எதிரெதிர் துருவமான சிவசேனாவுக்கு ஆதரவு அளிக்க வேண்டாம் என காங்கிரஸ் தலைவர்கள் ஒருசிலர் கருத்து தெரிவித்ததாகவும், இதனை காங்கிரஸ் தலைமை தீவிரமாக பரிசீலனை செய்ததாகவும் கூறப்படுகிறது.

இதேபோல், சிவசேனாவுக்கு ஆதரவு அளிக்க வேண்டாம் என கடைசி நேரத்தில் சரத்பவார், சோனியா காந்தியை போனில் தொடர்பு கொண்டு கூறியதாகவும் தகவல்கள் வெளியாகி உள்ளன.

மராட்டிய மாநிலத்தில் ஒரு அரசை  அமைக்கத் தவறினால் மாநிலத்தில் காங்கிரஸ் கட்சியே இல்லாமல் போய்விடும் என்று மாநில காங்கிரஸ் தலைவர்கள் ஒரே குரலில் சோனியா காந்தியிடம் எச்சரித்து உள்ளனர். 

காங்கிரஸ் தலைவர்கள் அசோக் சவான், பிருத்விராஜ் சவான், பாலாசாகேப் தோரட், மாணிக்ராவ் தாக்ரே மற்றும் ரஜனி பாட்டீல் ஆகியோர் தேர்தலுக்குப் பின்னர் பாரதீய ஜனதா  கூட்டணி வீழ்ச்சியால் வழங்கப்பட்ட வாய்ப்பைப் பயன்படுத்த வேண்டியதன் அவசியத்தை வலியுறுத்தி உள்ளனர்.

எவ்வாறாயினும், இந்த வாதங்களுக்கு சில காங்கிரஸ் மூத்த தலைவர்கள் கடும் எதிர்ப்பை தெரிவித்து உள்ளனர். மூத்த தலைவர்கள் ஏ.கே. அந்தோணி , முகுல் வாஸ்னிக் மற்றும் முன்னாள் உள்துறை மந்திரி சிவ்ராஜ் பாட்டீல் ஆகியோர் இந்துத்துவா பின்னணியைக் கொடுத்த கருத்தியல் காரணங்களுக்காக சிவசேனாவுடன் கைகோர்த்ததற்கு எதிராக பேசினர்.

ஒரு கட்டத்தில், முன்னாள் முதல்வர் அசோக் சவான் "வகுப்புவாதத்துடன்" அரசாங்கத்தை அமைப்பதற்கான முன்மாதிரியைக் கேள்வி எழுப்பினார். கட்சியில் உள்ள  சிறுபான்மையினரை புண்படுத்தும் என கூறினார்.

இந்த கருத்து வேறுபாடுகளுக்கு மத்தியில் சோனியாகாந்தி  மராட்டிய மாநில விவகாரத்தில் முடிவு எடுக்க தயங்கினார்.