மத்திய அமைச்சர் நிதின் கட்காரிக்கு கொரோனா தொற்று

புதுடெல்லி, 

இந்தியாவில் மின்னல் வேகத்தில் பரவி வரும் கொரோனா தொற்று பாதிப்புக்கு எந்த ஒரு தரப்பினரும் தப்பவில்லை. மாநில முதல் மந்திரிகள், மந்திரிகள், மத்திய அமைச்சர்கள், எம்.பிக்கள் என மக்கள் பிரதிநிதிகளும் கொரோனா தொற்று பாதிப்பு ஆளாகி வருகின்றனர். 

 உள்துறை அமைச்சர் அமித்ஷா உள்பட 7 மத்திய அமைச்சர்கள் இதுவரை கொரோனா தொற்றால் பாதிக்கப்பட்டுள்ளனர். இந்த நிலையில், மத்திய சாலைப்போக்குவரத்து துறை அமைச்சர் நிதின் கட்காரிக்கும் கொரோனா தொற்று உறுதி செய்யப்பட்டுள்ளது. 

தனக்கு கொரோனா தொற்று இருப்பதை டுவிட்டரில் பதிவிட்டுள்ள நிதின் கட்காரி, பதிவில் கூறியிருப்பதாவது:- “ நேற்று நான் மிகவும் பலவீனமாக உணர்ந்தேன். எனவே, எனது மருத்துவரிடம் பரிந்துரையின் பேரில் கொரோனா தொற்று பரிசோதனை செய்து கொண்டேன். இதில் எனக்கு தொற்று உறுதி செய்யப்பட்டுள்ளது. தற்போது நலமாக இருக்கிறேன். என்னை நானே தனிமைப்படுத்திக்கொண்டுள்ளேன்.  சமீப காலங்களில் என்னை சந்தித்தவர்கள்  கவனமாகவும் மருத்துவ நடைமுறைகளையும் பின்பற்றி நலமாக இருக்குமாறு வலியுறுத்துகிறேன்” என்று தெரிவித்துள்ளார்.