கடந்த 5 ஆண்டுகளில் நாட்டின் ஒட்டுமொத்த ஃபாஸ்டேக் வசூல் ரூ.1.18 லட்சம் கோடி - மத்திய அரசு தகவல்

புதுடெல்லி,

ஃபாஸ்டேக் திட்டம் அறிமுகப்படுத்தப்பட்ட பிறகு, சுங்கச்சாவடிகளில் சுங்கக்கட்டண வசூல் அதிகரித்துள்ளதா என மாநிலங்களவை உறுப்பினர் கனிமொழி சோமு கேள்வி எழுப்பியிருந்தார். 

இதற்கு பதிலளித்த மத்திய அமைச்சர் நிதின் கட்க்ரி, 2016-17 ஆம் நிதியாண்டில் நாடு முழுவதும் ஃபாஸ்டேக் திட்டம் அறிமுகப்படுத்தப்பட்டிருப்பதாகவும், அதிலிருந்து ஆண்டு தோறும் சுங்கக்கட்டண வசூல் அதிகரித்து வருவதாகவும் தெரிவித்தார். 

குறிப்பாக ஃபாஸ்டேக் திட்டம் தொடங்கப்பட்ட 2016-17 ஆம் நிதியாண்டில் நாட்டின் ஒட்டுமொத்த சுங்க வசூல் ரூ.17,942 கோடியாக இருந்தது என்றும் அதனை தொடர்ந்து 2017-18 ஆம் நிதியாண்டில் ரூ.21,948 கோடியாகவும், 2018-19 ஆம் நிதியாண்டில் ரூ.24,396 கோடியாகவும், 2019-20 ஆம் நிதியாண்டில் ரூ.26,850 கோடியாகவும், நடப்பு நிதியாண்டில் ரூ.27,744 கோடியாகவும் அதிகரித்துள்ளதாக அவர் கூறியுள்ளார். 

மொத்தமாக கடந்த 5 ஆண்டுகளில் ஃபாஸ்டேக் வசூல் மூலம் ஒரு லட்சத்து 18 ஆயிரத்து 881 கோடி ரூபாய் வருமானம் கிடைத்திருப்பதாக மத்திய அரசு தரப்பில் தெரிவிக்கப்பட்டுள்ளது குறிப்பிடத்தக்கது.