வேளாண் சட்டங்களை மத்திய அரசு மீண்டும் கொண்டு வரும் என்று கூறவில்லை - நரேந்திர சிங் தோமர்

புதுடெல்லி,

இந்தியாவில் பிரதமர் நரேந்திர மோடி அரசு 2019ஆம் ஆண்டில் நிறைவேற்றிய சர்ச்சைக்குரியதாக கருதப்பட்ட மூன்று வேளாண் சட்டங்களை திரும்பப் பெறும் மசோதா நாடாளுமன்றத்தின் இரு அவைகளிலும் நிறைவேற்றப்பட்டது.

முன்னதாக மத்திய அரசின் புதிய வேளாண் சட்டங்களை எதிர்த்து பஞ்சாப், அரியானா உள்ளிட்ட பல்வேறு மாநில விவசாயிகள் டெல்லிக்கு பேரணியாக சென்றனர்.  கடந்த ஆண்டு நவம்பரில் தொடங்கிய இந்த போராட்டம் ஓராண்டாக நீடித்தது. இந்த சூழலில் வேளாண் சட்டங்கள் வாபஸ் பெறப்படும் என்றும் குளிர்கால கூட்டத்தொடரில் அதற்கான மசோதாக்கள் தாக்கல் செய்யப்படும் என்றும் பிரதமர் மோடி அறிவிப்பு வெளியிட்டிருந்தார். 

விவசாயிகளின் நலனைக் கருத்தில் கொண்டு இந்த சட்டங்களை மத்திய அரசு கொண்டு வந்ததாகவும் இருப்பினும், சிலருக்கு இதைப் புரிய வைக்க முடியவில்லை என்பதால் சட்டங்கள் வாபஸ் பெறப்படுவதாக அவர் தெரிவித்தார். ஆனால் அடுத்தாண்டு தொடக்கத்தில் நடைபெற உள்ள பஞ்சாப் மற்றும் உத்தரப் பிரதேச தேர்தலைக் கருத்தில் கொண்டே இந்த முடிவு எடுக்கப்பட்டுள்ளதாக எதிர்கட்சிகள் குற்றம் சாட்டியிருந்தனர். 

இந்த சூழலில் மராட்டிய மாநிலத்தில் நடைபெற்ற தனியார் முதலீட்டு மாநாட்டில் பேசிய வேளாண் துறை மந்திரி நரேந்திர சிங் தோமர், “ விவசாயத் திருத்தச் சட்டங்களை நாங்கள் கொண்டு வந்தோம்.  சுதந்திரத்திற்குப் பிறகு 70 ஆண்டுகளுக்குப் பிறகு, பிரதமர் நரேந்திர மோடியின் தலைமையில் ஒரு பெரிய சீர்திருத்தம் கொண்டு வரப்பட்டது. ஆனால், சிலருக்கு இது பிடிக்கவில்லை. ஆனால், இதைக் கண்டு அரசு ஏமாற்றமடையவில்லை. இப்போது ஒரு படிதான் பின்வாங்கியுள்ளோம். ஆனால் விவசாயிகள் தான் இந்தியாவின் முதுகெலும்பு என்பதால் கண்டிப்பாக மீண்டும் முன்னோக்கிச் செல்வோம்” என்று  அவர் தெரிவித்திருந்தார். நரேந்திர சிங் தோமரின் இந்த பேச்சுக்கு எதிர்க்கட்சி தரப்பில் கடும் கண்டனம் தெரிவிக்கப்பட்டிருந்தது.  

இந்நிலையில் வேளாண் சட்டங்களை மத்திய அரசு மீண்டும் கொண்டு வருவோம் என நான் சொல்லவில்லை என்று நரேந்திர சிங் தோமர் தெரிவித்துள்ளார். மேலும் அவர் கூறுகையில், “மத்திய அரசு சிறப்பான வேளாண் சட்டங்களை கொண்டு வந்தது என்று நான் சொன்னேன். சில காரணங்களுக்காக நாங்கள் அதை திரும்பப் பெற்றோம். ஆனால் விவசாயிகளுக்கான நலத்திட்டங்களுக்காக மத்திய அரசு தொடர்ந்து செயல்படும் என்று தான் நான் சொல்ல வந்தேன்” என்று அவர் தெரிவித்துள்ளார்.