காங்கிரஸ் கட்சியின் நிலைமை இப்போது வென்டிலேட்டரில் உள்ளது - மத்திய மந்திரி முக்தார் அப்பாஸ் நக்வி விமர்சனம்

புதுடெல்லி,

காங்கிரஸ் கட்சியின் நிலைமை இப்போது வென்டிலேட்டரில் உள்ளது என மத்திய மந்திரி முக்தார் அப்பாஸ் நக்வி விமர்சித்தார்.

மத்திய மந்திரி முக்தார் அப்பாஸ் நக்வி புதுடெல்லியில் நடைபெற்ற ஹஜ் பயண தொடக்க நிகழ்ச்சியில் பங்கேற்ற பிறகு செய்தியாளர்களிடம் பேசினார். அப்போது அவர் கூறியதாவது:-

காங்கிரஸ் கட்சியின் நிலை இப்போது வென்டிலேட்டரில் உள்ளது. அக்கட்சி தலைவர்களின் முட்டாள்தனம் மின்னல் வேகத்தில் உள்ளது. காங்கிரஸ் தீங்கு விளைவிக்கும் சித்தாந்தத்துடன்(பாஜக) போராடவில்லை. ஆனால் அதன் சொந்த தலைவர்களின் தீங்கு விளைவிக்கும் முட்டாள்தனத்துடன் தான் போராடி வருகிறது.

பிரதமர் நரேந்திர மோடியை விமர்சிப்பதில் காங்கிரசின் வெறியானது, நாட்டை அவமதிக்கும் சதி என்ற நிலையை எட்டியுள்ளது. காங்கிரஸ் தலைவர்கள் வெளிநாட்டில் இந்தியாவை அவமதிக்கிறார்கள்.அவர்கள் இந்தியாவை இழிவுபடுத்துவதற்காகவே, நம் நாட்டில் பயம் மற்றும் வெறுப்பு என்ற போலியான மற்றும் புனையப்பட்ட கதையை வளர்க்கிறார்கள். இதன்மூலம், நம் நாட்டின் நல்லிணக்கம் மற்றும் சகிப்புத்தன்மையின் வலிமையைக் கெடுக்கும் விதத்தில் அவர்கள் செயல்படுகின்றனர்.

இது காங்கிரஸ் தலைவர்களின் அறியாமை மற்றும் முட்டாள்தனத்தின் உச்சத்தை தெளிவாக பிரதிபலிக்கிறது. காங்கிரஸின் எதிர்மறை நிலப்பிரபுத்துவ மனப்பான்மை காரணமாக உள்ளூர் அரசியலில் கூட இப்போது அக்கட்சி மக்களால் ஏற்றுக்கொள்ளப்படவில்லை.

இவ்வாறு அவர் கூறினார்.

முன்னதாக, லண்டனில் நடைபெற்ற நிகழ்ச்சியில் கலந்துகொண்டு பேசிய காங்கிரஸ் தலைவர் ராகுல் காந்தி, பிரதமர் மோடியையும் பாஜக அரசையும் கடுமையாக விமர்சித்து பேசினார். இதனையடுத்து அவரது கருத்துக்கு பாஜக எதிர்ப்பு தெரிவித்து வருகிறது. அந்த வகையில் இன்று காங்கிரஸ் மீது, மந்திரி முக்தார் அப்பாஸ் நக்வி விமர்சனம் வைத்துள்ளார்.