பசவண்ணர் ஏற்படுத்திய ஜனநாயகத்தை யாராலும் அழிக்க முடியாது; பாகல்கோட்டையில் ராகுல் காந்தி பேச்சு

பெங்களூரு:

பசவ ஜெயந்தி

உத்சவ சமிதி அமைப்பு சார்பில் பசவ ஜெயந்தி பாகல்கோட்டை மாவட்டம் கூடலசங்கமாவில் நேற்று நடைபெற்றது. இந்த விழாவில் அகில இந்திய காங்கிரஸ் முன்னாள் தலைவர் ராகுல் காந்தி கலந்து கொண்டு பேசும்போது கூறியதாவது:-

பசவ ஜெயந்தி அன்று நான் இங்கு வந்துள்ளது மகிழ்ச்சி அளிக்கிறது. என்னை இங்கே அழைத்து உபசரிப்பு வழங்கியுள்ளீர்கள். அதற்காக நன்றி தெரிவிக்கிறேன். பசவண்ணர் ஜனநாயகத்தை இந்தியாவுக்கும், உலகிற்கும் அறிமுகம் செய்தார். இது உண்மை. இந்த ஜனநாயகத்தை யாராலும் அழிக்க முடியாது. நாடாளுமன்றம், ஆட்சி அதிகார முறை வந்துள்ளது.

மிகப்பெரிய விஷயம்

நமது ஜனநாயகத்தில் பசவண்ணரின் கொள்கைகள் அடங்கியுள்ளன. உங்களிடம் இருழ் சூழ்ந்திருந்தால், அதை அகற்ற எங்கே ஓரிடத்தில் இருந்து விளக்கு எரியும். அதே போல் சமுதாயத்தில் இருழ் சூழ்ந்தபோது பசவண்ணர் விளக்காக தோன்றினார். தனிப்பட்ட நபர்கள் வெளிச்சத்தை கொடுக்க மாட்டார்கள். பிறரை பார்த்து கேள்வி கேட்பது எளிது. ஆனால் பசவண்ணர், முதலில் தன்னிடம் கேள்பி கேட்டு கொள்வார். இது மிகப்பெரிய ஒரு விஷயம்.

பசவண்ணர் 8 வயதாக இருந்தபோது, அவருக்கு வேறு சாதியை சேர்ந்தவர்கள் நண்பர்களாக இருந்தனர். அந்த நண்பர் ஒருவர் மீது தாக்குதல் நடந்தபோது, எதற்காக அவரை தாக்குகிறார்கள் என்று பசவண்ணர் தனக்குத்தானே கேள்வி கேட்டு கொண்டதாக இங்குள்ள மடாதிபதி கூறினார். சிறு வயதிலேயே இந்த ஒரு ஞானம் அவருக்கு எப்படி என்று மடாதிபதியிடம் கேட்டேன்.

தயங்குகிறார்கள்

பசவண்ணர் தனது வாழ் நாள் முழுவதும், இந்த சாதி முறை, விரோதம் மற்றும் ஜனநாயகம் குறித்து தனக்குத்தானே கேள்வி கேட்டு கொண்டார். அதன் பிறகு தனது மனதில் தோன்றிய விஷயத்தை தனது வாழ்நாள் முழுவதும் பசவண்ணர் பின்பற்றினார். இன்று பலர் கேள்வி கேட்கிறார்கள். உண்மையை அறிந்து கொள்கிறார்கள். ஆனால் தாங்கள் அறிந்த உண்மையை சமுதாயத்தில் கூற தயங்குகிறார்கள்.

பெரும்பாலானோருக்கு உண்மைகள் தெரியும். ஆனாலும் அந்த உண்மை குறித்து குரல் எழுப்புவது இல்லை. அதற்கு காரணம் அவர்கள் பயப்படுகிறார்கள். ஆனால் பசவண்ணர் தான் அறிந்த உண்மையை பயப்படாமல் சமுதாயத்தில் கூறினார். அதனால் தான் அவர் மற்றவர்களை விட தனித்து காணப்பட்டார். இந்த சமுதாயத்தில் உண்மையை பேசுவது சுலபமான விஷயமல்ல.

மரியாதை கிடைக்காது

இன்று பசவண்ணரின் சிலைக்கு மாலை அணிவித்து நாம் மரியாதை செலுத்துகிறோம். ஆனால் அவர் சமுதாயத்தில் உண்மையை பேசும்போது அவர் மீது தாக்குதல் நடந்திருக்கும். அவர்களை மிரட்டி இருப்பார்கள். ஆனால் அவற்றுக்கு எல்லாம் அவர் பயப்படாமல் உண்மையின் பாதையில் பயணித்தார். உண்மையை பேச பயந்து கொண்டு நாம் விலகி சென்றால், நமக்கான மரியாதை கிடைக்காது.

இன்று (நேற்று) நான் பல்வேறு விஷயங்களை கற்று கொண்டேன். பசவண்ணர் குறித்து நான் புத்தங்களில் படித்து அறிந்து கொண்டுள்ளேன். அவரின் கொள்கைகள் நமக்கு வழிகாட்டியாக உள்ளன. பசவண்ணர், என்றைக்கும் பயப்பட வேண்டாம், உண்மையின் பாதையில் பயணிக்க வேண்டும், மற்றவர்களை மதிக்க வேண்டும் என்று நமக்கு வழிகாட்டியுள்ளார். இந்த விஷயம் குறித்து பலர் பேசுகிறார்கள். ஆனால் சிலர் மட்டுமே அவரது கொள்கையை பின்பற்றுகிறார்கள்.

இவ்வாறு ராகுல் காந்தி பேசினார்.