அரிவாளால் வெட்டி ரவுடி படுகொலை; மர்ம கும்பலுக்கு வலைவீச்சு

சிவமொக்கா;

ரவுடி படுகொலை

சிவமொக்கா டவுனை சேர்ந்தவர் ஹந்தி அண்ணி(வயது 40). ரவுடியான இவர் மீது பல்வேறு போலீஸ் நிலையங்களில் கொலை, கொள்ளை வழக்குகள் உள்ளன.

இந்த நிலையில் நேற்று காலை ஹந்தி அண்ணி, வினோபா நகர் போலீஸ் சவுக் பகுதியில் நடந்து சென்று கொண்டிருந்தார்.

அப்போது அங்கு 2 கார்கள் வந்து நின்றது. அந்த கார்களில் இருந்து கைக்குட்டையால் முகத்தை மூடிக்கொண்டு 6 பேர் கொண்ட கும்பல் இறங்கினர். பின்னர் அவர்கள் அரிவாள்களால், ஹந்தி அண்ணியை சரமாரியாக வெட்டிவிட்டு கார்களில் தப்பிசென்றுவிட்டனர்.

இதில் பலத்த காயம் அடைந்து ரத்த வெள்ளத்தில் துடிதுடித்து ஹந்தி அண்ணி சம்பவ இடத்திலேயே உயிரிழந்தார். இதைப்பார்த்து அதிர்ச்சி அடைந்த அப்பகுதி மக்கள், வினோபா நகர் போலீசாருக்கு தகவல் கொடுத்தனர்.

அதன்பேரில் போலீசார் சம்பவ இடத்திற்கு விரைந்து வந்து பார்வையிட்டனர். பின்னர் கொலையான ஹந்தி அண்ணியின் உடலை கைப்பற்றி பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர்.

பரபரப்பு

இதற்கிடையே தகவல் அறிந்து சிவமொக்கா மாவட்ட போலீஸ் சூப்பிரண்டு லட்சுமி பிரசாத் சம்பவ இடத்திற்கு விரைந்து வந்து விசாரணை நடத்தினார். ஆனால் ரவுடி ஹந்தியை கொன்ற நபர்கள் யார், எதற்காக கொன்றனர் என்பது தெரியவில்லை. முன்விரோதத்தில் கொலை நடந்திருப்பதாக போலீசார் கருதுகின்றனர்.

இதுகுறித்து வினோபாநகர் போலீசார் வழக்குப்பதிவு செய்துகொண்டனர். மேலும் கொலையாளிகளை வலைவீசி தேடிவருகின்றனர். பட்டபகலில் ரவுடி படுகொலை செய்யப்பட்ட சம்பவம் அப்பகுதியில் பெரும் பரபரப்பை ஏற்படுத்தியது.