2024-25-ம் ஆண்டில் 3.2 கோடி டன் கோதுமை கொள்முதல் செய்ய இலக்கு - மத்திய அரசு தகவல்

புதுடெல்லி,

மத்திய உணவுத்துறை செயலாளர் சஞ்சீவ் சோப்ரா தலைமையில் மாநில உணவுத்துறை செயலாளர்களின் ஆலோசனை கூட்டம் நேற்று நடந்தது. இந்த கூட்டத்துக்குப்பின் மத்திய உணவுத்துறை அமைச்சகம் வெளியிட்ட அறிக்கையில், '2024-25-ம் ஆண்டு குறுவை சந்தை பருவத்தில் 3 முதல் 3.2 கோடி டன் வரை கோதுமை கொள்முதல் செய்ய இலக்கு நிர்ணயிக்கப்பட்டு உள்ளது' என கூறப்பட்டு இருந்தது.

2023-24 பயிர் ஆண்டில் (ஜூலை-ஜூன்) 11.4 முதல் 11.5 கோடி டன் கோதுமை உற்பத்தியை விவசாய அமைச்சகம் எதிர்பார்க்கும் போதிலும் குறைந்த இலக்கு நிர்ணயிக்கப்பட்டுள்ளதாகவும் அந்த அறிக்கையில் கூறப்பட்டு இருந்தது.

இதைப்போல நெல் கொள்முதலை பொறுத்தவரை 90 லட்சம் முதல் 1 கோடி டன் வரை குறுவை சந்தைப்பருவத்தில் கொள்முதல் செய்ய இலக்கு நிர்ணயிக்கப்பட்டு இருப்பதாகவும் உணவுத்துறை அமைச்சகம் கூறியிருக்கிறது.