தஞ்சை பெரியகோவிலில் 1008 சங்காபிஷேகம்

தஞ்சை பெரிய கோவிலில் 1,008 சங்காபிஷேகம் நேற்று நடைபெற்றது. கார்த்திகை சோமவாரமும், பிரதோஷமும் ஒரே நாளில் வந்ததால் ஏராளமான பக்தர்கள் தரிசனம் செய்தனர்.

1008 சங்காபிஷேகம்

தஞ்சை பெரிய கோவில் உலக பிரசித்தி பெற்ற கோவிலாகும். இந்த கோவில் தமிழர்களின் கட்டிடக்கலைக்கு எடுத்துக்காட்டாக திகழ்ந்து வருகிறது. இந்த கோவிலில் கார்த்திகை சோமவார விழாவையொட்டி சங்காபிஷேகம் நடைபெறும்.

கார்த்திகை மாதம் திங்கட்கிழமை சோமவாரமாக கடை பிடிக்கப்பட்டு வருகிறது. இதையொட்டி கார்த்திகை மாத முதல் சோமவாரமான நேற்று தஞ்சை பெரிய கோவிலில், பெருவுடையார் சன்னதி முன்பு 1008 சங்குகளில் புனித நீர் நிரப்பப்பட்டு சிவலிங்க வடிவிலான சங்குகள் அடுக்கி வைக்கப்பட்டு சிறப்பு யாகம் நடத்தப்பட்டது.

1008 சங்காபிஷேகம்

இதனையடுத்து 1008 சங்குகளில் நிரப்பப்பட்ட புனித நீரால் பெருவுடையாருக்கு சிறப்பு அபிஷேகம் மற்றும் அலங்காரம் தீபாராதனை நடைபெற்றது. மேலும், இதே நாளில் பிரதோஷத்தை முன்னிட்டு, நந்தியம் பெருமானுக்கு மஞ்சள், பால், திரவிய பொடி உள்ளிட்ட மங்கள பொருட்களால் அபிஷேகம் நடந்தது.

சோமவார தினத்தில், பிரதோஷ வைபவம் என்பதால், அபிஷேகத்தை காண ஏராளமான பக்தர்கள் கலந்து கொண்டு சாமி தரிசனம் செய்தனர். இதே போல, வருகிற 28-ந் தேதி 2-வது சோமவாரமும், டிசம்பர் 5-ந் தேதி 3-வது சோமவாரமும், , டிசம்பர் 12-ந் தேதி 4-வது சோமவாரமும் நடைபெறுகிறது.