பள்ளி மாணவர்களுக்கு கஞ்சா விற்ற 2 பேர் கைது

திருக்கோவிலூர்,

அரகண்டநல்லூர் அருகே வீரபாண்டி கிராமத்தில் உள்ள அரசு மேல்நிலைப்பள்ளி அருகில் மாணவர்களுக்கு கஞ்சா விற்பனை செய்யப்படுவதாக போலீசாருக்கு ரகசிய தகவல் கிடைத்தது. அதன்படி துணை போலீஸ் சூப்பிரண்டு பார்த்திபன் தலைமையிலான போலீசார் அரசு பள்ளி அருகில் தீவிர கண்காணிப்பு பணியில் ஈடுபட்டனர். அப்போது, மாணவர்களுக்கு கஞ்சா விற்றுக்கொண்டிருந்த 2 பேரை பிடித்து விசாரணை நடத்தினர். விசாரணையில் அவர்கள், சென்னை துரைப்பாக்கம் செல்வவிநாயகர் கோவில் தெருவை சேர்ந்த சண்முகம் மகன் ஜெகன் (வயது 23) மற்றும் 16 வயதுடைய சிறுவன் என்பது தெரியவந்தது. இதையடுத்து அவர்களை போலீசார் கைது செய்தனர். அவர்களிடம் இருந்த 350 கிராம் கஞ்சா பறிமுதல் செய்யப்பட்டது.