ரேஷன் அரிசி கடத்திய 2 பேர் கைது

பர்கூர் அருகே உள்ள தட்டக்கரை பகுதியில் ரேஷன் அரிசி கடத்தப்படுவதாக ஈரோடு குடிமை பொருள் கடத்தல் தடுப்பு பிரிவு போலீசாருக்கு தகவல் கிடைத்தது. அதன்பேரில், போலீசார் தட்டக்கரை பஸ் நிறுத்தம் பகுதியில் நேற்று ரகசியமாக கண்காணிப்பு பணியில் ஈடுபட்டிருந்தனர். அப்போது, சந்தேகப்படும்படியாக அங்கு வந்த ஆம்னி வேனை தடுத்து நிறுத்தி போலீசார் சோதனையிட்டனர்.

அந்த வேனில் 18 மூட்டைகளில் 900 கிலோ ரேஷன் அரிசி கடத்தி வந்தது தெரியவந்தது. இதைத்தொடர்ந்து போலீசார் ஆம்னி வேனில் இருந்த 2 பேரிடம் விசாரணை நடத்தினர். விசாரணையில் அவர்கள், பவானி திருவள்ளுவர் நகரை சேர்ந்த பாலு (வயது 50), உதயகுமார் (55) ஆகியோர் என்பதும், அதிக விலைக்கு விற்பதற்காக ரேஷன் அரிசியை கடத்தி சென்றதும் தெரியவந்தது. இதைத்தொடர்ந்து போலீசார் வழக்குப்பதிவு செய்து 2 பேரையும் கைது செய்தனர்.