வாலிபரை காரில் கடத்த முயன்ற 2 பேர் கைது

மதுரை ஏழு கடல் தெருவை சேர்ந்தவர் ஆதித்யா (வயது 31). இவர் புதுராம்நாட்ரோடு பகுதியில் சென்று கொண்டிருந்தார். அப்போது காரில் 2 பேர் வந்து ஆதித்யாவை கடத்த முயன்றனர். அப்போது அவர்களுக்குள் தள்ளுமுள்ளு ஏற்பட்டது. மேலும் அவர் சத்தம் போட அக்கம்பக்கத்தினர் அங்கு விரைந்து வந்தனர். அதை பார்த்த அவர்கள் காரில் தப்பி விட்டனர். இது குறித்து ஆதித்யா தெப்பக்குளம் போலீசில் புகார் செய்தார். போலீசார் வழக்கு பதிவு செய்து விசாரணை நடத்தினர். அதில் மாப்பாளையம் அன்சாரி நகர் முதல் தெருவை சேர்ந்த சேக்தாவூது (41), இஸ்மாயில் (50) ஆகியோர் இந்த சம்பவத்தில் ஈடுபட்டது தெரியவந்தது. இதையடுத்து அவர்களை போலீசார் கைது செய்தனர். எதற்காக அவர்கள் ஆதித்யாவை காரில் கடத்த முயன்றனர்? என்பது குறித்து போலீசார் தொடர்ந்து விசாரணை நடத்தி வருகின்றனர்.