வெவ்வேறு விபத்துகளில் 2 பேர் பலி

திருமங்கலம்,

வெவ்வேறு விபத்துகளில் 2 பேர் பலியானார்கள்.

வாலிபர் சாவு

கள்ளிக்குடி அருகேயுள்ள சிவரக்கோட்டையை சேர்ந்தவர் சுரேஷ்கண்ணன். இவருடைய மகன் அழகேசன் (வயது 22). இதே கிராமத்தை சேர்ந்த சிவக்குமார் மகன் கதிர்வேலு (22). நேற்று அதிகாலை 5.30 மணியளவில் இவர்கள் இருவரும் சிவரக்கோட்டையில் மதுரை - விருதுநகர் நான்குவழிச்சாலையை நடந்து கடந்துள்ளனர். அப்போது விருதுநகரில் இருந்து பலசரக்கு ஏற்றி கொண்டு மதுரை நோக்கி சென்ற மினிவேன் இவர்கள் 2 பேர் மீதும் மோதியது. இதில் இருவரும் தூக்கி வீசப்பட்டனர். இதில் அழகேசன் சம்பவ இடத்திலேயே உயிரிழந்தார். கதிர்வேலு படுகாயமடைந்து உயிருக்கு போராடினார். அக்கம்பக்கத்தினர் இவரை மீட்டு திருமங்கலம் அரசு மருத்துவமனைக்கு அனுப்பிவைத்தனர். தகவல் அறிந்த கள்ளிக்குடி போலீசார் உயிரிழந்த அழகேசன் உடலை கைப்பற்றி பிரேத பரிசோதனைக்கு அனுப்பிவைத்து தப்பியோடிய மினிவேன் டிரைவரை தேடி வருகின்றனர்.

கிராமப்புற கலைஞர் பலி

எழுமலை அருகே உள்ள பொட்டல்பட்டியை சேர்ந்தவர் அய்யப்பன் (வயது 70).கிராமப்புற கலைஞர். இவர் எழுமலையில் இருந்து பொட்டல்பட்டிக்கு சாலையோரத்தில் நடந்து கொண்டிருந்தார். அப்போது பின்னால் வந்த மோட்டார் சைக்கிள் மோதியதில் அய்யப்பன் பரிதாபமாக இறந்தார். மோட்டார் சைக்கிளில் வந்த பாண்டிமுருகன்(20) ஆஸ்பத்திரியில் தீவிரமாக சிகிச்சை பெற்று வருகிறார்.

இது குறித்து எழுமலை இன்ஸ்பெக்டர் செல்வம் வழக்கு பதிவு விசாரித்து வருகிறார்.