சாலையோர பள்ளத்தில் கார் கவிழ்ந்து புதுமாப்பிள்ளை உள்பட 2 பேர் பலி

புதுமாப்பிள்ளை

புதுக்கோட்டை மாவட்டம் மீமிசல் அருகே உள்ள ஆர்.புதுப்பட்டினம் கிராமத்தை சேர்ந்தவர் முனியப்பன் மகன் லட்சுமணன் (வயது 32). இவர் அதே பகுதியில் மீன் பிடி தொழில் செய்து வந்தார். இவருடைய மனைவி பாக்கியலட்சுமி. இவர்களுக்கு கடந்த 5 மாதங்களுக்கு முன்பு திருமணம் நடைபெற்றது.

இவருடைய நண்பர் அதே பகுதியை சேர்ந்த சுப்பிரமணியன் மகன் தினகரன் (31). இவர் அதே பகுதியில் மளிகை கடை நடத்தி வந்தார்.

2 பேர் பலி

தினகரனின் பாட்டி கடந்த 2 நாட்களுக்கு முன்பு உடல்நலக்குறைவால் இறந்துவிட்டார். இதனால் தினகரன் மற்றும் அவரது நண்பர் லட்சுமணன் ஆகியோர் சரிவர தூங்கவில்லை என்று கூறப்படுகிறது. இந்நிலையில் நேற்று முன்தினம் நள்ளிரவு 2 மணியளவில் தினகரன், லட்சுமணனுடன் ஆர்.புதுப்பட்டினத்தில் இருந்து கிழக்கு கடற்கரை சாலை வழியாக முத்துகுடாவுக்கு காரில் சென்றுள்ளார். காரை தினகரன் ஓட்டினார்.

பொன்னமங்கலம் பிரிவு சாலை அருகே சென்றபோது கட்டுப்பாட்டை இழந்த கார் தாறுமாறாக சென்று சாலையோர பள்ளத்தில் தலைகுப்புற கவிழ்ந்தது. இந்த விபத்தில் படுகாயம் அடைந்த தினகரன் மற்றும் லட்சுமணன் ஆகியோர் சம்பவ இடத்திலேயே பரிதாபமாக இறந்தனர்.

பிரேத பரிசோதனை

இந்த விபத்து குறித்து தகவல் அறிந்த மீமிசல் போலீசார் சம்பவ இடத்திற்கு விரைந்து சென்றனர். பின்னர் 2 பேரின் உடல்களையும் மீட்டு பிரேத பரிசோதனைக்காக மணமேல்குடி அரசு மருத்துவமனைக்கு அனுப்பி வைத்தனர். இந்த விபத்து குறித்து மீமிசல் போலீசார் வழக்குப்பதிவு செய்து விசாரணை நடத்தி வருகின்றனர்.

விபத்தில் புதுமாப்பிள்ளை உள்பட 2 பேர் பலியான சம்பவம் அப்பகுதி மக்களிடையே சோகத்தை ஏற்படுத்தியுள்ளது.