வெவ்வேறு சாலை விபத்துகளில் முதியவர் உள்பட 2 பேர் பலி

முதியவர் பலி

சென்னை-திருச்சி தேசிய நெடுஞ்சாலையில் பெரம்பலூர் மாவட்டம், எறையூர் சின்னாறு பகுதியில் இன்றுஅதிகாலையில் மொபட்டில் இருந்து கீழே விழுந்து 60 வயது மதிக்கத்தக்க ஆண் ஒருவர் இறந்து கிடந்தார். இதுகுறித்து தகவலறிந்த மங்களமேடு போலீசார் சம்பவ இடத்துக்கு விரைந்து சென்றனர். பினனர் முதியவரின் உடலை கைப்பற்றி பிரேத பரிசோதனைக்காக பெரம்பலூர் அரசு மருத்துவமனைக்கு அனுப்பி வைத்தனர். மேலும் இது தொடர்பாக போலீசார் வழக்குப்பதிவு செய்து இறந்தவர் யார்? அவர் எந்த ஊரைச் சேர்ந்தவர்? என்பது குறித்து விசாரணை நடத்தினர்.

இதில், இறந்தவர் வேப்பந்தட்டை தாலுகா, பிரம்மதேசத்தை சேர்ந்த அய்யாகண்ணு (வயது 65) என்பது தெரியவந்தது. அவர் மொபட்டில் செல்லும் போது நிலைத்தடுமாறி கீழே விழுந்ததில் படுகாயமடைந்து உயிரிழந்திருக்கலாம் என்று போலீசார் தெரிவித்தனர்.

வாகனம் மோதி விபத்து

இதேபோல் ஆலத்தூர் கேட் மேற்கு தெருவை சேர்ந்த பாலுசாமி (45) என்பவர் நேற்று இரவு திருச்சி-சென்னை தேசிய நெடுஞ்சாலையில் ஆலத்தூர் கேட் பகுதியில் சாலையை கடக்க முயன்றார். அப்போது அந்த வழியாக வந்த அடையாளம் தெரியாத வாகனம் பாலுசாமி மீது மோதியது. இதில் படுகாயமடைந்த அவர் சம்பவ இடத்திலேயே பரிதாபமாக உயிரிழந்தார்.

இந்த விபத்து குறித்து தகவலறிந்த பாடாலூர் போலீசார் சம்பவ இடத்துக்கு விரைந்து சென்றனர். பின்னர் பாலுசாமியின் உடலை கைப்பற்றி பிரேத பரிசோதனைக்காக பெரம்பலூர் அரசு மருத்துவமனைக்கு அனுப்பி வைத்தனர். மேலும் இது தொடர்பாக போலீசார் வழக்குப்பதிவு செய்து விபத்தை ஏற்படுத்தி சென்ற வாகனம் குறித்து விசாரணை நடத்தி வருகின்றனர்.