சாலையில் சுற்றித்திரிந்த 20 மாடுகள் பிடிப்பட்டன

வேலூர் மாநகராட்சி பகுதியில் போக்குவரத்து மற்றும் பொதுமக்களுக்கு இடையூறாக கால்நடைகள் சுற்றித்திரிவதாக கமிஷனர் ரத்தினசாமிக்கு புகார்கள் வந்தன.

அவரது உத்தரவின்பேரில் மாநகராட்சி பகுதியில் சாலையில் சுற்றித்திரியும் மாடுகளை 4 மண்டலங்களிலும் சுகாதார அலுவலர்கள் தலைமையிலான மாநகராட்சி ஊழியர்கள் பிடிக்கும் பணியில் ஈடுபட்டனர்.

அப்போது சில மாடுகள் மிரண்டு அங்கும் இங்குமாக ஓடின. சிறிதுநேர சிரமத்துக்கு பின்னர் 4 மண்டலங்களில் 20 மாடுகள் பிடிப்பட்டன.

2 மாடுகளின் உரிமையாளர்களுக்கு தலா ரூ.1,000 அபராதம் விதிக்கப்பட்டது.

மற்ற மாடுகள் மண்டல அலுவலக வளாகத்தில் கட்டி வைக்கப்பட்டுள்ளன. மாட்டின் உரிமையாளர்களுக்கு அபராதம் விதிக்கப்பட்டு பின்னர் அவை ஒப்படைக்கப்படும் என்று மாநகராட்சி அதிகாரிகள் தெரிவித்தனர்.