திட்டமிட்ட படி 12 ஆம் தேதி அதிமுக பொதுக்குழு கூட்டம் நடைபெறும்: ஜெயக்குமார்

சென்னை,

அ.தி.மு.க.வில் தற்போது நிலவிவரும் அசாதாரண சூழ்நிலையில், எடப்பாடி பழனிசாமி, ஓ.பன்னீர்செல்வம் அணியினரின் பொதுக்குழு கூட்டம் 12-ந் தேதி (செவ்வாய்கிழமை) காலை 10.35 மணிக்கு சென்னையை அடுத்த வானகரத்தில் உள்ள ஸ்ரீவாரு வெங்கடாஜலபதி பேலஸ் திருமண மண்டபத்தில் நடைபெற இருக்கிறது.

இந்த கூட்டத்தில், சுமார் 3 ஆயிரம் பொதுக்குழு உறுப்பினர்கள் கலந்துகொள்ள இருக்கின்றனர். அவர்களுக்கான அழைப்பு கடிதம் கொரியர் பதிவு தபால் மூலம் அனுப்பப்பட்டு வருகிறது. கூட்டத்திற்கு வரும்போது, பொதுக்குழு உறுப்பினர்கள் அனைவரும் தவறாமல் கவருடன் கூடிய அழைப்பிதழை உடன் கொண்டுவர வேண்டும் என்றும் அறிவுறுத்தப்பட்டுள்ளனர். அதிமுக பொதுக்குழுவை கூட்டுவதற்கு தினகரன் தரப்பு கடும் எதிர்ப்பு தெரிவித்து வருகிறது. பொதுக்குழு கூட்டத்திற்கு தடை விதிக்க கோரி தினகரன் ஆதரவு எம்.எல்.ஏ வெற்றிவேல் சென்னை உயர் நீதிமன்றத்தில் மனு தாக்கல் செய்துள்ளார். இந்த மனு வரும் 11 ஆம் தேதிக்கு விசாரணைக்கு வர உள்ளது.

இதனால்,அரசியல் வட்டாரத்தில் பரபரப்பு ஏற்பட்டுள்ளது. இந்த நிலையில், திட்டமிட்ட படி 12 ஆம் தேதி அதிமுக பொதுக்குழு கூட்டம் நடைபெறும் என்று அமைச்சர் ஜெயக்குமார் செய்தியாளர்களுக்கு பேட்டி அளிக்கையில் தெரிவித்தார். 

மேலும், ஜெயக்குமார் கூறுகையில்,  கட்சி விதிப்படி 5-ல் ஒரு பங்கு உறுப்பினர்கள் ஆதரவுடன் பொதுக்குழு கூட்ட ஏற்பாடு செய்யப்பட்டுள்ளது. திட்டமிட்ட படி 12 ஆம் தேதி பொதுக்குழு கூட்டம் நடைபெறும். என் கேள்விகளுக்கு பதிலளிக்க முடியாமல் என்னை தரமற்ற முறையில் விமர்சனம் செய்கின்றனர். ஜக்கயனைப்போல் தினகரன் ஆதரவு எம்.எல்.ஏக்கள் எங்கள் அணிக்கு வருவார்கள்” இவ்வாறு அவர் தெரிவித்தார்.