மந்திரி சபையில் தமிழகம் புறக்கணிப்பு தி.மு.க-காங்கிரஸ் கூட்டணி எம்.பி.க்கள் விழிப்புடன் செயல்பட வேண்டும் கே.எஸ்.அழகிரி அறிக்கை

சென்னை,

தமிழ்நாடு காங்கிரஸ் தலைவர் கே.எஸ்.அழகிரி வெளியிட்டுள்ள அறிக்கையில் கூறியிருப்பதாவது:-

நடந்து முடிந்த நாடாளுமன்றத் தேர்தலை தொடர்ந்து மீண்டும் பிரதமராக நரேந்திர மோடியோடு 57 மந்திரிகளும் பதவியேற்று உள்ளனர். பா.ஜனதாவோடு கூட்டணி சேர்ந்து போட்டியிட்ட அ.தி.மு.க. சார்பாக எவரும் மந்திரிசபையில் சேர்க்கப்படவில்லை.

மக்களவையில் ஒரு தொகுதியில் மட்டும் வெற்றி பெற்றிருந்தாலும் ஏற்கனவே மாநிலங்களவையில் 13 உறுப்பினர்களை அ.தி.மு.க. பெற்றிருக்கிறது. இவர்களது ஆதரவு என்பது மத்திய பா.ஜ.க. அரசுக்கு மிகமிக அவசியமாகும். ஆனாலும், அ.தி.மு.க.விலிருந்து எவரையும் மத்திய மந்திரிசபையில் சேர்க்காமல் புறக்கணித்திருப்பதன் மூலம் அ.தி.மு.க.வை மட்டுமல்ல, தமிழகத்தையும் புறக்கணித்திருப்பதாகவே கருத வேண்டியதாக இருக்கிறது.

நரேந்திர மோடிக்கு எதிராக தமிழகத்தில் எதிர்ப்பு அலை வீசிய காரணத்தால் இத்தகைய புறக்கணிப்பு நடைபெற்று இருப்பதாகவே எண்ண தோன்றுகிறது. ஏதோ ஒரு உள்நோக்கத்துடன் தமிழகம் புறக்கணிக்கப்பட்டிருக்கிறது. இதற்கு முழு பொறுப்பு பிரதமர் நரேந்திர மோடி தான்.

இத்தகைய சூழலில் காவிரி நீர், மேகதாது அணை, பாலாறு, ‘நீட்’ தேர்வு போன்ற பல்வேறு பிரச்சினைகளில் தமிழகத்தின் உரிமைகளை மறுக்கிற வகையில் மத்திய பா.ஜ.க. அரசு செயல்படுவதற்கு நிறைய வாய்ப்புகள் இருக்கின்றன. எனவே தி.மு.க.-காங்கிரஸ் கூட்டணி எம்.பி.கள் 37 பேரும் மிகுந்த விழிப்புணர்வுடன் செயல்பட்டு தமிழகத்தின் உரிமைகளை பாதுகாப்பதில் தீவிர முனைப்பு காட்ட வேண்டும். இவ்வாறு அதில் கூறப்பட்டுள்ளது.