‘மாவட்ட தலைவர்கள் 3 விதமான தேர்வை சந்திக்க வேண்டும்’ காங்கிரஸ் நிர்வாகிகள் கூட்டத்தில் கே.எஸ்.அழகிரி கெடு விதிப்பு

தமிழ்நாடு காங்கிரஸ் கட்சி அலுவலகமான சத்தியமூர்த்தி பவனில் உள்ளாட்சி தேர்தல் குறித்த மாவட்ட தலைவர்கள், நிர்வாகிகள் ஆலோசனை கூட்டம் நடந்தது. இந்த கூட்டத்திற்கு மாநிலத்தலைவர் கே.எஸ்.அழகிரி தலைமை தாங்கினார். மேலிட பொறுப்பாளர்கள் சஞ்சய்தத், சிரிவல்லபிரசாத் ஆகியோர் முன்னிலை வகித்தனர். செயல் தலைவர் எச்.வசந்தகுமார் எம்.பி., முன்னாள் தலைவர்கள் கே.வி.தங்கபாலு, கிருஷ்ணசாமி, முன்னாள் மத்திய மந்திரி தனுஷ்கோடி ஆதித்தன், மாவட்ட தலைவர்கள் கராத்தே தியாகராஜன், எம்.எஸ்.திரவியம் உள்பட பலரும் கலந்து கொண்டனர். கூட்டத்தை தொடங்கி வைத்து கே.எஸ்.அழகிரி பேசினார்.

கூட்டத்தில் கே.எஸ். அழகிரி பேசியதாவது:- மாநில காங்கிரஸ் தலைமை மாறும்போது பொதுவாக 10 அல்லது 20 மாவட்ட தலைவர்களை மாற்றுவார்கள். இது கடந்த காலங்களில் நடந்த வரலாறு. தலைவருக்கு ஒத்துழைப்பு வழங்குவதற்காக இதுபோன்ற நடவடிக்கைக்கு கட்சியின் தேசிய தலைமை அனுமதி வழங்கும். ஆனால் நான் மாவட்ட தலைவர்களுக்கு 3 விதமான தேர்வு வைக்க இருக்கிறேன். அது என்ன மாதிரி தேர்வு என்பதை பின்னால் சொல்கிறேன். தேர்வில் வெற்றி பெறுகிறவர்களே மாவட்ட தலைவர்களாக நீடிக்க முடியும். மற்றவர்கள் இப்போதே விலகிக்கொள்ளலாம்.