ஆஸ்திரேலியா செல்லாமலேயே மெல்போர்ன் பல்கலைக்கழக படிப்பில் மாணவர்கள் சேர புதிய முயற்சி

சென்னை,

உலகளாவிய தரவரிசையில் 33-வது இடத்தில் ஆஸ்திரேலியாவின் மெல்போர்ன் பல்கலைக்கழகம் இருக்கிறது. இந்த பல்கலைக்கழகத்துடன் கல்வி, ஆராய்ச்சியில் இணைந்து செயல்பட சென்னை பல்கலைக்கழகத்துக்கு, பல்கலைக்கழகத்தின் சிண்டிகேட் ஒப்புதல் அளித்து இருக்கிறது. அதன் அடிப்படையில் மெல்போர்ன் பல்கலைக்கழகத்தின் பி.எஸ்சி. (கலப்பு படிப்பு) படிப்பை வரும் கல்வியாண்டில் (2022-2023) சென்னை பல்கலைக்கழகம் அறிமுகம் செய்ய உள்ளது.

12-ம் வகுப்பு முடித்த மாணவர்கள் உயர்கல்விக்காக ஆஸ்திரேலியா, அமெரிக்கா, இங்கிலாந்து உள்ளிட்ட நாடுகளுக்கு சென்று படிக்கும் நிலையை மாற்றவும், இந்தியாவிலேயே உலகத்தரத்திலான படிப்பை வழங்கவும் இந்த புதிய முயற்சியை, சென்னை பல்கலைக்கழகம் முன்னெடுத்திருக்கிறது.

இதன் 3 ஆண்டுகால படிப்பில் முதல் 2 ஆண்டுகள் இயற்பியல், வேதியியல், கணிதம், உயிரியல் மற்றும் நடைமுறை படிப்புகள் கற்றுத்தரப்படும் என்றும், இறுதியாண்டில் 3 முக்கிய துறை படிப்புகளில் ஒன்றை கலப்பு மைய படிப்புகளாக தேர்வு செய்து படிக்கலாம் என்றும் தெரிவிக்கப்பட்டிருக்கிறது.

இதற்கான புரிந்துணர்வு ஒப்பந்தம் இன்று (திங்கட்கிழமை) 2 பல்கலைக்கழகங்களுக்கு இடையே கையெழுத்தாகிறது. இதன் வாயிலாக புதிய படிப்பு அறிமுகம் செய்யப்படுவதோடு, கருத்தரங்குகள், பணியாளர்கள் பரிமாற்றம் போன்ற கூட்டு நடவடிக்கைகளில் ஈடுபடுவது, கல்வி பொருட்கள் மற்றும் கல்வி வெளியீடுகள், தகவல் பரிமாற்றம் செய்துகொள்வது போன்ற பல்வேறு நடவடிக்கைகள் மேற்கொள்ளப்பட உள்ளன.